तनहुँ । जेठ २९
सुनमा लगाईएको २ प्रतिशत बिलाशिता कर र बहुमुल्य हिरामा लगाईएको १३ प्रतिशत भ्याट खारेज गर्नुपर्ने माग गर्दै सुनचाँदी व्यवसायीहरुले विहिबार दमौलीमा विरोध प्रर्दशन गरेका छन् ।
उनीहरुले सुनको भन्सार दर ६ प्रतिशत कायम गर्नुपर्ने तथा सुनचाँदी कारोबारको लागि प्रष्ट नीति र नियमावली निर्माण गर्नुपर्ने माग गरेका थिए ।
सुनचाँदी व्यवसायी संघको कार्यालयबाट प्लेकार्ड सहित जिल्ला प्रशासन कार्यालयमा गएका व्यवसायीहरुले प्रमुख जिल्ला अधिकारी मार्फत अर्थमन्त्रीलाई ज्ञापनपत्र समेत बुझाएका छन् । सुनचाँदी व्यवसायी संघ तनहुँ र सुनचाँदी रत्न आभुषण संघ तनहुँले विहिबार नै पत्रकार सम्मेलन गरि सरकारले थोपरेको कर र भ्याटले सर्वसाधरण नै मारमा पर्ने भन्दै उक्त कर खारेज गर्नुपर्ने बताए ।
पत्रकार सम्मेलनमा सुनचाँदी व्यवसायी संघ तनहुँका अध्यक्ष हरि गहतराजले सरकारले बजेट भाषण मार्फत ल्याएको कर सम्बन्धी नीति खारेज गर्नुपर्ने बताए ।
