देवघाट । असार ५
देवघाट गाउँपालिका-५ का ३२ बर्षीय प्रकाश पौडेलको हत्या गरि भागेका २ जनालाई प्रहरीले पक्राउ गरेको छ । पक्राउ पर्नेमा मकवानपुर जिल्ला हेटौडा उपमहानगरपालिका वडा नं. ३ हटिया घर भई हाल देवघाट गाउँपालिका वडा नं.५ मा ज्याला मजदुरी गरी बस्ने वर्ष ४२ को राम लामा र पाल्पा जिल्ला तानसेन नगरपालिका वडा नं. ८ नयाँपाटी घर भई हाल देवघाट गाउँपालिका वडा नं. ५ मा ज्याला मजदुरी गरी बस्ने वर्ष २८ को बुद्ध सारु मगर रहेका छन् ।
लामा र मगरले देवघाट गाउँपालिका-५ बद्रीमुक्ती टोलका पौडेलको बिहिवार बिहान कुटपिट गरि हत्या गरि भागेको प्रहरीले जनाएको छ । पौडेल बिहीबार बिहान ५ बजे घरदेखी ३ सय मिटर पर कच्ची सडकमा लडिरहेको अवस्थामा स्थानीयहरुले देखि तत्काल उपचारको लागि भरतपुर सरकारी अस्पताल चितवन लगिएकोमा उपचारको क्रममा मृत्यु भएको थियो ।
पौडेलको मृत्यु भएको भन्ने जानकारी प्राप्त हुनासाथ इलाका प्रहरी कार्यालय आबुँखैरेनीबाट प्रहरी निरीक्षक टेक प्रसाद सुवेदीको कमाण्डमा खटिएको टोलीले घट्नाको सम्बन्धमा सुक्ष्म रुपमा अनुसन्धान गर्दा मृतक पौडेल लामा र मगरसँग बसी मादक पदार्थ (रक्सी) सेवन गरी झै-झगडा हुँदा कुटपिट गरेको जानकारी प्राप्त भएपछि कुटपिटमा संलग्न फरार लामा र मगरको खोजतलास गरी उनीहरूलाई पक्राउ गरिएको इलाका प्रहरी कार्यालय आबुँखैरेनीले जनाएको छ ।
उक्त घटनाको सम्बन्धमा थप अनुसन्धान कार्य भइरहेको प्रहरीले जनाएको छ।
