तनहुँ । असार १४
नेकपा एमालेका स्थायी कमिटि सदस्य तथा गन्डकी प्रदेशका पुर्व मुख्यमन्त्री खगराज अधिकारीले एमालेका अध्यक्ष केपी शर्मा ओली नै जननेता मदन भन्डारीको सच्चा र योग्य अनुयायी भएको बताएका छन् । नेकपा एमाले तनहुँ जिल्ला कमिटिको पुर्ण बैठक तथा ७४ औं मदन जयन्तीको अवसरमा आयोजित कार्यक्रमलाई सम्बोधन गर्दै अधिकारीले अध्यक्ष केपी शर्मा ओली नै मदन भण्डारीको सच्चा अनुयायी भएको हुँदा ओलीको नेतृत्वमा मात्रै एमाले अगाडि बढ्ने बताए ।
नेकपा एमाले भित्र विवाद सिर्जना गर्न केही नेताहरुले ७० वर्षको उमेर हदको कुरा उठाएको भन्दै अधिकारीले भने ‘उमेर हद भनेको प्रबन्धीय कुरा हो, आवश्यक परेको बेला आउँछ, आवश्यक नपरेको बेला हट्छ । यो कुनै बाध्यकारी हैन ।’ एमाले भित्र विवाद र गुट सिर्जना गर्न केहि नेताहरुले यस्ता विषय ल्याएको अधिकारीले आरोप लगाए ।
जनताको बहुदलिय जनबाद नै नेपाली क्रान्तिको मौलिक कार्यक्रम भएको भन्दै अधिकारीले जबज नै नेपाली राजनीतिको सही बाटो भएको बताए । ‘नेपालमा जवज र मदनको लोकप्रियता बढेको बेला मदन भन्डारीको हत्या गरियो’ उनले भने । लोकतन्त्र, मानवअधिकार, विधिको शासन र बहुदलिय प्रतिश्पर्धा जवजको विशेषता भएको अधिकारीले बताए ।
एमाले जिल्ला कमिटिका अध्यक्ष हरिराज कडेंलको अध्यक्षतामा अयाोजित उक्त कार्यक्रममा एमाले पोलिट्व्युरो सदस्य टुकराज सिग्देल, केन्द्रीय सदस्य तथा तनहुँ जिल्ला इन्चार्ज केदार सिग्देल लगायतले मन्तव्य राखेका थिए ।
