विष्णु मगर । देवघाट, असार १४
देवघाट गाउँपालिका–५ स्थित मधुवन चोकदेखी थापाचोक सम्मको सडक कालोपत्रे गर्ने क्रममा भएको केही कमजोरीलाई सुधार गरेर उक्त सडक कालोपत्रे गरिने भएको छ । देवघाट गाउँपालिकाका प्राविधिकले शनिबार विहान उक्त सडकको स्थलगत अनुगमन गरि कालोपत्रे गर्ने क्रममा केही कमजोरी भएको हुँदा उक्त कमजोरी सुधारेर योजना सम्पन्न गर्न निर्माण कम्पनीका प्रतिनिधिलाई निर्देशन दिए ।
विशेषगरि कालोपत्रे गर्नु अघि हालिएको प्राईममा माटो देखिएपछि केही उपभोक्ताले विरोध गरेका थिए । त्यसबारेमा देवघाट अनलाइनको फेसबुक पेजमा भिडियो प्रशारण भएपछि देवघाट गाउँपालिकाको ध्यानाकर्षण भएको थियो ।
स्थानिय उपभोक्ताले कतै खाडल र कतै मापदण्ड अनुसार गिट्टि नपुगेको भनी गुनासो गरेपछि गाउँपालिकाले निर्माण कम्पनीका प्रतिनिधिलाई बोलाई समन्वय गरेका थिए । सो क्रममा निर्माण कम्पनीका प्रतिनिधिले सडकमा खाल्टाखुल्डी पुरी माटोहरु फालेर काम अगाडि बढाउने प्रतिबद्धता जनाएका थिए ।
देवघाट गाउँपालिकाको भ्याट रकम सहित १९ लाख ३८ हजार ८४५ रुपैयाँको लागतमा १०६ मिटर सडक मर्मत सहितको कालापेत्र गर्न सतिस कन्ट्रक्सन एण्ड सप्लायर्स प्रालि देवघाटले ठेक्का लिएको थियो ।
