तनहुँ । साउन २०
बन्दीपुर गाउँपालिकाको टोलीले लमजुङ जिल्लाको दोर्दी गाउँपालिकामा गरिएको अकवरे खुर्सानी खेतीको अवलोकन गरेको छ । गाउँपाालिकाका अध्यक्ष सुरेन्द्रबहादुर थापाको नेतृत्वको टोलीले मंगलबार दोर्दी गाउँपालिकामा गई अकबरे खुर्सानी खेतीको अवलोकन गरेका थिए ।
गाउँपालिकाका अध्यक्ष सुरेन्द्रबहादुर थापा, प्रमुख प्रशासकीय अधिकृत यादवराज आचार्य, विभिन्न वडाका वडाध्यक्ष, कृषि तथा पशु प्राविधिकहरू सहितको टोलीले दोर्दी गाउँपालिकाको हटिया क्षेत्रस्थित करिब ६५० रोपनीमा फैलिएको अकबरे खुर्सानी खेतीको अध्ययन अवलोकन गरेको बन्दीपुर गाउँपालिका पशु सेवा शाखाका प्रमुख मधुबिलास न्यौपानेले बताए ।
बन्दीपुर गाउँपालिकाले चालु वर्ष अकबरे खुर्सानी खेतीमा किसानलाई सहयोग गर्ने नीति लिएको भन्दै दोर्दीको सफल अभ्यासको अवलोकन गरिएको गाउँपालिकाका अध्यक्ष थापाले बताए ।
