तनहुँ । असोज ७
मुग्लिन–नारायणगढ सडकको तुइन खोलामा मंगलबार साँझ गएको ठुलो पहिरोले उक्त सडक दुई तर्फी नै अवरुद्ध भएको छ । ठुलो पहिरो खसेको कारण सो सडक बुधबार दिनभर पनि खुल्न नसक्ने सडक डिभिजन कार्यालय चितवनले जनाएको छ । यस्तो अवस्थामा गन्तव्यमा जान निस्किएका हजारौं यात्रुहरु अलपत्र पर्ने भएका छन् ।
मुग्लिन–नारायणगढ सडकको विकल्पमा तनहुँको भिमाद–मानपुर–नवलपुरको डेढगाउँ हुँदै कालीगन्डकी करिडोर पछिल्लो समय विकल्प भएको छ । केही दुरी लामो हुने भएपनि उक्त सडक विशेषगरि गन्डकी प्रदेशका जनतालाई नारायणगढ वा तराईका जिल्ला जानको लागि प्रयोगमा आउन थालेको छ ।
उक्त कालीगन्डकी करिडोर हुँदै गैडाकोट जानको लागि पृथ्वीराजमार्ग स्थित तनहुँको खैरेनीटारबाट भिमाद हुँदै घिरिङ गाउँपालिकाको मानपुर भएर नवलपुरको डेढगाउँ निस्किएर त्यहाँबाट कालीगन्डकी करिडोरको पक्की सडक हुँदै गैडाकोट निस्कन सकिन्छ ।
खैरेनीटारबाट भिमादसम्म कालोपत्रे, भिमादबाट मानपुरसम्म ग्राभेल सडक, मानपुरबाट डेढगाउँसम्म कालोपत्रे सडक र डेडगाउँबाट गैडाकोटसम्म कालोपत्रे सडक हुँदै गन्तव्यमा पुग्न सकिन्छ । डेडगाउँबाट गैडाकोटको दुरी ७० किमि रहेको छ ।
