काठमाडौं । कार्तिक २
स्वास्थ्य तथा जनसंख्या मन्त्रालयकी अतिरिक्त सचिव डा.संगीता मिश्रविरुद्ध भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगले आइतबार डा.मिश्रविरुद्ध विशेष अदालत काठमाडौंमा भ्रष्टाचार मुद्दा दायर गरेको आयोगका प्रवक्ता राजेन्द्र कुमार पौडेलले जानकारी दिए ।
उनीमाथि एमआरआई मेसिन खरिदमा मिलेमतोको आरोप छ । उनी स्वास्थ्य सेवा विभागको महानिर्देशक हुँदा एमआरआई खरिद भएको थियो ।
आफूलाई सचिव नबनाइएको भन्दै उनले तत्कालीन स्वास्थ्यमन्त्री प्रदीप पौडेलविरुद्ध अभिव्यक्ति दिएकी थिइन् । त्यतिबेला सरकारले डा. विकास देवकोटालाई स्वास्थ्य सचिव बनाएको थियो ।
देवकोटा सचिव बनेपछि उनी राजीनामा दिएर बसेकी थिइन् । यद्यपि उनको राजीनामा भने स्वीकृत भएको थिएन । सुशीला कार्कीको नेतृत्वमा सरकार बनेपछि उनी मन्त्रालय जान थालेकी थिइन् । उनी हालको अन्तरिम सरकारमा स्वास्थ्यमन्त्री बन्ने चर्चामा समेत थिइन् ।
