देवघाट । कार्तिक ३
देवघाटधाम जेसीजको जेसीज सप्ताह २०२५ सुरु भएको छ । सप्ताहको सोमबार माँ कल्याणी वैदिक कन्या गुरुकुलम देवघाटमा सामाग्री वितरण गरि शुभारम्भ गरियो । जेसीज सप्ताह अन्तर्गतको उक्त कार्यक्रमको देवघाट गाउँपालिकाका अध्यक्ष तिलबहादुर थापाले उद्घाटन गरेका थिए ।
सप्ताहको कार्यक्रमको पहिलो दिन देवघाटधाम जेसीजले उक्त गुरुकुलका विद्यार्थीलाई स्टेशनरी वितरण तथा गुरुकुललाई ४ थान पंखा प्रदान गरेको थियो । सो अवसरमा बोल्दै देवघाट गाउँपालिकाका अध्यक्ष तिलबहादुर थापाले देवघाटधाम जेसीजको समाजसेवी भावना र युवाहरुको सक्रियता, नेतृत्व प्रशंसनीय रहेको बताउदै गाउँपालिकाको निरन्तर सहयोग रहने प्रतिवद्दता समेत व्यक्त गरे ।
देवघाटधाम जेसीजका अध्यक्ष प्रशन्न ढकालको अध्यक्षतामा भएको उक्त कार्यक्रममा उद्देश्य र महत्वका बारेमा जेसीज सप्ताह–२०२५ का मूल संयोजक तथा देवघाटधाम जेसीज–२०२५ का महासचिव अर्जुन सुवेदीले प्रकाश पारेका थिए । कार्यक्रममा देवघाटधाम जेसीजका निवर्तमान अध्यक्ष रघु मल्ल, गुरुकुल प्रतिनिधि बिनोद कुमार थापा लगायतले मन्तव्य राखेका थिए ।
देवघाटधाम जेसीजका अध्यक्ष ढकालका अनुसार उक्त पंखा पिपलटार विजुली पसल, देवघाटका प्रोप्राइटर डिल्लीराम गिरीले प्रदान गरेका थिए । सो कार्यक्रमको सञ्चालन देवघाटधाम जेसीज–२०२५ कि तालिम आयुक्त स्वस्तिका धितालले गरेकी थिइन् ।
