तनहुँ । बैशाख ९
व्यास नगरपालिकाले वडा नम्बर १४ को केशवटारमा मंगलबार एकिकृत घुम्ति शिविर सन्चालन गरेको छ ।
एकै स्थानबाट सबै प्रकारको सेवाहरु उपलब्ध गराउने उद्देश्यले घुम्ति शिविर सन्चालन गरिएको नगरपालिकाले जनाएको छ । सो कार्यक्रममा बोल्दै नगरप्रमुख बैकुण्ठ न्यौपानेले एकिकृत घुम्ती शिविर मार्फत नगरपालिकाले सबै प्रकारका सेवाहरु उपलब्ध गराउने उद्देश्य राखिएको बताए ।
उक्त शिविरमा प्रशासन शाखा तथा पन्जिकरण एकाई मार्फत सामाजिक सुरक्षा भत्ताको कार्ड वितरण तथा व्यक्तिगत घटना दर्ता गरिएको थियो । त्यस्तै योजना शाखा मार्फत वडामा सन्चालन हुने योजनाहरुको सम्झौता तथा भुक्तानीको सिफारिस गरिएको थियो ।
साथै कृषि उपशाखा मार्फत बालिमा देखिने विभिन्न रोगहरुको विषादी तथा औषधी वितरण एवं सचेतनाका कार्यक्रम सन्चालन गरिएको थियो ।
सो शिविरमा नगरपालिकाकी उपप्रमुख इन्दिरा दरै, वडा सदस्य दुर्गाबहादुर आले, कार्यपालिका सदस्य नरीमाया थापा, उपसचिव केदारप्रसाद आचार्य, प्राविधिक लगायत विभिन्न शाखाका कर्मचारीहरुको सहभागिता रहेको थियो ।
