देवघाट । जेठ ८
देवघाट गाउँपालिका अन्तर्गतका स्वास्थ्य संस्थाहरुमा बैशाख महिनाभर १७०८ जना सेवाग्राहीले सेवा लिएका छन् । कुल सेवाग्राही मध्ये ९५९ जना महिला र ७४९ जना पुरुष सेवाग्राही रहेका छन् । कुल सेवाग्राही मध्ये पहिलोपटक सेवा लिनेको संख्या ५४७ रहेको छ । उक्त संख्यामा आकस्मिक स्वास्थ्य सेवा लिनेको संख्या २५० रहेको छ ।
देवघाट गाउँपालिका अन्तर्गतका स्वास्थ्य संस्थाहरुबाट आकस्मिक र बहिरंग सेवा, नियमित खोप सेवा, गाउँघर क्लिनिक सेवा, पोषण सेवा, सुरक्षित मातृत्व सेवा, परिवार नियोजन सेवा, डट्स सेवा, आमाबाट बच्चामा हुने एचआईभी संक्रमणको परिक्षण सेवा, नसर्ने रोगको परिक्षण सेवा, मलेरिया परिक्षण सेवा, कुष्ठरोग सेवा, प्रयोगशाला सेवा, पुर्ण खोप सुनिश्तिता तथा दिगोपना सम्बन्धि घरधुरी सर्वेक्षण सेवा, बालबालिकाको पोषण लेखाजोखा सेवा तथा दन्त परिक्षण सेवा लगायतका स्वास्थ्य सेवाहरु प्रदान भईरहेको गाउँपालिकाको स्वास्थ्य शाखाले जनाएको छ ।
नियमित खोप सेवा पाउनको संख्या ५१७ रहेको छ भने पुर्ण खोप पाएका बालबालिकाको संख्या २० रहेको छ । भिटामिन ए र जुकाको औषधी पाउने बालबालिकाको संख्या ७७४ रहेको छ । सुरक्षित मातृत्व तर्फ २२ जना महिलाले सेवा लिएका छन् । परिवार नियोजन सेवा तर्फ सरकारी स्वास्थ्य संस्थाबाट बैशाख महिना भर ७०५ वटा कन्डम निशुल्क वितरण गरिएको स्वास्थ्य शाखाले जनाएको छ । त्यस्तै ६८१ जना महिलाले परिवार नियोजन सम्बन्धि विभिन्न सेवा लिएका छन् ।
त्यसैगरि बैशाख महिनामा क्षयरोगका १ जना विरामी पहिचान भई डट्स उपचार सेवामा आएका छन् । त्यसैगरि गाउँपालिकाका ४३ जना महिला स्वास्थ्य स्वयंसेविकाहरुबाट ८५६ जनालाई स्वास्थ्य सम्बन्धि परामर्श सेवा प्रदान गरिएको छ । आमाबाट बच्चामा हुने एचआईभी संक्रमणको परिक्षण सेवा अन्तर्गत ९ जना बालबालिकाको एचआईभी परिक्षण गरिएको छ । त्यस्तै नसर्ने रोग तर्फ २९५ जनाको उच्च रक्तचाप तथा मधुमेहको परिक्षण गरिएको छ । २२ जनाको मलेरिया परिक्षणकोलागि रक्त परिक्षण गरिएको छ भने १ जना नयाँ कुष्ठरोगी फेला परेको देवघाट गाउँपालिकाका स्वास्थ्य शाखा प्रमुख प्रदिपकुमार बुढाथोकीले जानकारी दिए ।
त्यसैगरि १३० जनाले प्रयोगशालाको सेवा लिएका छन् भने १० जनाले दन्त सम्बन्धि सेवा लिएका छन् । पुर्ण खोप सुनिश्तिता तथा दिगोपना घोषणाकोलागि ३६०८ घरधुरीमा सर्वेक्षण गरिएको छ । त्यसैगरि ६ महिनादेखी ५९ महिनासम्मका बालबालिकाको पोषण लेखाजोखा गरिएको संख्या ६८७ रहेको स्वास्थ्य शाखा प्रमुख बुढाथोकीले बताए ।
