तनहुँ । असार १३
म्याग्दे गाउँपालिका–१ स्थित साँगे खोलामा करेन्ट लगाएर अवैध रूपमा माछा मारिरहेको अवस्थामा छ जनालाई प्रहरीले नियन्त्रणमा लिएको छ ।
जिल्ला प्रहरी कार्यालय तनहुँका सूचना अधिकारी तथा प्रहरी नायब उपरीक्षक द्वारिकाप्रसाद घिमिरेका अनुसार करेन्ट प्रयोग गरी माछा मारिरहेको भन्ने विशेष सूचना प्राप्त हुनासाथ प्रहरी टोली घटनास्थलमा खटिएको थियो । प्रहरी टोलीले माछा मार्न प्रयोग गरिने ब्याट्री, इन्भर्टर जस्ता विद्युतीय उपकरण र अन्य सामग्रीसहित उनीहरूलाई रङ्गेहात नियन्त्रणमा लिएको हो ।
नियन्त्रणमा लिइएका व्यक्तिहरूलाई आवश्यक कानुनी कारबाहीका लागि व्यास नगरपालिकाको कार्यालयमा पठाइएको थियो । स्थानीय सरकार सञ्चालन ऐन तथा पर्यावरण संरक्षण सम्बन्धी स्थानीय व्यवस्था अनुसार नगरपालिकाको कार्यालयले शुक्रबार उनीहरूलाई जनही १० हजार रुपियाँ जरिवाना गरेको प्रहरीले जनाएको छ ।
