तनहुँ । साउन ४
तनहुँको आँबुखैरेनी गाउँपालिकाले पालिकाभित्रका भूमिहीन सुकुम्बासीहरूलाई लालपूर्जा वितरण गर्ने प्रक्रिया अगाडि बढाएको छ । गत साउन १ गते बसेको आँबुखैरेनी गाउँकार्यपालिकाको बैठकले वडा नम्बर १ देखि वडा नं. ६ सम्मका ३८ जना भूमिहीन सुकुम्बासीहरूको विवरण प्रमाणित गरेको छ ।
प्रमाणित गरिएको उक्त विवरण लालपूर्जा वितरण कार्यका लागि भूमि समस्या समाधान समिति, तनहुँमा पेश गरिएको गाउँपालिकाले जनाएको छ ।
गाउँपालिकाका अध्यक्ष शुक्र चुमानका अनुसार भूमिहीन परिवारलाई सम्पत्ति अधिकार, सम्मानित जीवन र सुरक्षित भविष्य प्रदान गर्नु स्थानीय सरकारको प्रतिबद्धता रहेको छ ।
गाउँपालिकाले ‘भूमिहीनको हातमा धनी पुर्जा–समतामूलक समाजको ऊर्जा’ भन्ने नीति अङ्गीकार गर्दै समावेशी विकास, भूमि अधिकार, र पारदर्शी सेवा प्रवाहलाई प्राथमिकतामा राखेर समृद्ध आँबुखैरेनी निर्माणको लक्ष्य लिएको अध्यक्ष चुमानले बताए ।
