तनहुँ । साउन ४
आर्थिक वर्ष २०८२/०८३ मा तनहुँका संघ अन्तर्गतका कार्यालयबाट ५० दशमलव ८७ प्रतिशत पुँजीगत बजेट खर्च भएको छ ।
कोष तथा लेखा नियन्त्रक कार्यालय तनहुँका कोष नियन्त्रक सुदिपराज वस्नेतका अनुसार आर्थिक वर्ष २०८२/०८३ मा संघ तर्फ १३ अर्ब २९ करोड ९१ लाख ६८ हजार १३२ रूपैयाँ बजेट बिनियोजन भएकोमा १० अर्ब ९० करोड १७ लाख ७५ हजार ५१४ रूपैयाँ बजेट खर्च भएको हो । यो ८१.९७ प्रतिशत खर्च भएको हो ।
गत आवमा २ अर्ब २९ करोड ७३ लाख ९२ हजार ६१७ रूपैयाँ बजेट खर्च हुन नसकेको हो । त्यस्तै पूँजीगततर्फ ५० दशमलव ८७ प्रतिशत मात्रै बजेट खर्च भएको छ । पूँजीगततर्फ ३ अर्ब २६ करोड ९५ लाख १० हजार बजेट विनियोजन भएकोमा १ अर्ब ६६ करोड ३१ लाख ३० हजार रूपैया खर्च भएको कार्यालयका लेखापाल भरत आचार्यले जानकारी दिए ।
त्यस्तै चालुतर्फ १० अर्व २ करोड ९६ लाख ५७ हजार ३८२ बजेट विनियोजन भएकोमा ९ अर्व २३ करोड ८६ लाख ४५ हजार अर्थात ९२.११ प्रतिशत बजेट खर्च भएको छ । समयमा काम नहुनुमा जेनजी आन्दोलन, पेट्रोलियम पदार्थको मुल्य वृद्धि, समयमा काम गर्ने प्रवृत्ति लगायतका कारणले पुँजीगत बजेट खर्च न्युन भएको पाईएको लेखापाल आचार्यको भनाई छ ।
