देवघाट । साउन ६
जननायक विश्वेश्वरप्रसाद (विपी) कोइरालाको ४४ औं स्मृति दिवसको अवसरमा नेपाली कांग्रेस देवघाट गाउँपालिका–५ वडा कार्यसमितिले वृक्षारोपण कार्यक्रम सञ्चालन गर्नुका साथै अपाङ्ग बालकलाई आर्थिक सहयोग प्रदान गरेको छ ।
वातावरण संरक्षण र हरियाली प्रवद्र्धन गर्ने उद्देश्यले आयोजित वृक्षारोपण कार्यक्रममा विभिन्न प्रजातिका बिरुवा रोपिएका थिए । प्रकृतिको संरक्षण र भावी पुस्ताप्रतिको जिम्मेवारीलाई आत्मसात् गर्दै गरिएको यो अभियानले समाजमा सकारात्मक सन्देश प्रवाह गरेको सहभागीहरूले बताएका छन् ।
यसै अवसरमा देवघाट–५ कालिमाटी निवासी अपाङ्ग बालक रोमन गुरुङको खुट्टाको शल्यक्रियाका लागि नेपाली कांग्रेस देवघाटको तर्फबाट रु.२३ हजार आर्थिक सहयोग हस्तान्तरण गरिएको छ । कठिन परिस्थितिमा रहेको एक परिवारलाई गरिएको यो सहयोगले राजनीति केवल सत्ता प्राप्तिको माध्यम नभई समाजको दुःखमा साथ दिने मानवीय अभियान पनि हो भन्ने सन्देश दिएको छ ।
कार्यक्रममा बोल्दै देवघाट गाउँपालिका अध्यक्ष तिल बहादुर थापाले विपी कोइरालाले स्थापित गरेको मानवता, सेवा र सामाजिक न्यायको आदर्शलाई व्यवहारमा उतार्न सके मात्रै उनको स्मृतिप्रति सच्चा सम्मान हुने बताए । समाजका असहाय, अपाङ्ग तथा आर्थिक रूपमा कमजोर नागरिकको पीडामा साथ दिनु नै वास्तविक राजनीति र जनसेवाको उच्च उदाहरण भएको उनको भनाइ थियो ।
सहयोग ग्रहण गर्दै रोमन गुरुङका परिवारले नेपाली कांग्रेस देवघाट वडा कार्यसमिति तथा सहयोगी सबैप्रति हार्दिक आभार व्यक्त गर्दै यस्तो सहयोगले कठिन घडीमा उपचारप्रति नयाँ आशा र हौसला प्रदान गरेको बताए ।
