तनहुँ । साउन १०
दुलेगौँडा–हर्कपुर मोटरमार्गअन्तर्गत शुक्लागण्डकी नगरपालिका वडा नम्बर ३ उदेनढुंगामा बिग्रिएर बिजोग बनेको सडक मर्मत गरिएको छ । शुक्लागण्डकी नगरपालिका वडा नम्बर ३ को कार्यालयको विशेष पहल र स्थानीय बासिन्दाको श्रमदानमा आइतबार सो सडक मर्मत गरिएको हो ।
लामो समयदेखि सडक बिग्रिएर हिलो र खाल्डोका कारण सर्वसाधारण तथा सवारी चालकहरूले निकै सास्ती व्यहोर्दै आएका थिए । निर्माणको जिम्मा पाएको शंकरमाली कन्स्ट्रक्सनले समयमै काम नगर्दा सो सडकखण्ड अस्तव्यस्त बनेको थियो । सडकको बिजोग अवस्थालाई लिएर जनप्रतिनिधि र ठेकेदार कम्पनीविरुद्ध स्थानीय स्तरमा चौतर्फी आलोचना र विरोध भएपछि वडा कार्यालयले अग्रसरता देखाएको हो ।
सडक मर्मत कार्यमा वडा कार्यालयको टोलीसँगै स्थानीय बासिन्दाहरूले पनि उत्साहजनक रूपमा खटिएर श्रमदान गरेका थिए । उदेनढुंगाको मुख्य समस्याग्रस्त क्षेत्रमा खाल्डाखुल्डी पुर्ने र बाटो सहज बनाउने काम गरिएपछि अहिले सवारी साधन सञ्चालन र पैदलयात्रुलाई आवतजावतमा केही राहत मिलेको छ ।
यद्यपि, यो अस्थायी मर्मत मात्र भएकाले ठेकेदार कम्पनी शंकरमाली कन्स्ट्रक्सनलाई तुरुन्तै जिम्मेवार बनाएर सडकको पूर्ण र गुणस्तरीय निर्माण कार्य अगाडि बढाउन स्थानीयले माग गरेका छन् ।
