चितवनमा न्याय नपाएको भन्दै बिरामी काठमाडौँमा

Devghat Online

शेयर गरौ

चितवन खैरहनी नगरपालिका वडा नम्बर १३ का स्थायी बासिन्दा कुष्ठरोगी दम्पती शिवबहादुर सापकोटा र सबिना माझी सापकोटाले न्याय नपाएको भन्दै काठमाडौँ पुगेका छन् ।

एक बिघा जग्गा जालसाँझी गरेर छिमेकीले नै आफ्नो नाममा पारेको भन्दै उनीहरुले न्यायको याचना गरेका हुन् । आइतबार रिपोर्टर्स क्लब नेपाल काठमाडौँमा पत्रकार सम्मेलन गर्दै सापकोटा दम्पतीले यस्तो याचना गरे । छिमेकीसमेत रहेका गणेशकुमार श्रेष्ठले उनीहरुको जग्गा जालसाँझी गरेर आफ्नी बहिनीको नाममा (फिल्डबुक) मा दर्ता गराएको सापकोटा परिवारको आरोप छ । उनीहरुका अनुसार श्रेष्ठले आफ्नी बहिनी तिलमाया श्रेष्ठको नाममा सापकोटा दम्पतीको जग्गा फिल्डबुकमा दर्ता गराएका थिए । आफूहरु घरमा नभएको मौका छोपेर श्रेष्ठले जालसाँझी गरेको भन्दै न्याय माग्न स्थानीय निकायमा धाउँदासमेत जनप्रतिनिधिले कुनै सुनुवाइ नगरेको पीडित शिवबहादुर सापकोटाको गुनासो छ ।

उनले भने,‘हामी घरमा कोही पनि नभएको मौका छोपेर गणेश श्रेष्ठले यस्तो गलत काम ग¥यो । उसले २०६३ सालमै यस्तो गलत काम गरेको रहेछ, तर हामीले २०७४ सालमा मात्रै थाहा पायौं । थाहा पाउनेबित्तिकै हामी सम्बन्धित निकायमा पुगेर यस्तो गलत काम गरिएको रहेछ भनेर जानकारी गराएका थियौं । तर, वडाअध्यक्षले कुनै सुनुवाइ नै गर्नुभएन । उल्टै हामीलाई हप्की र दप्की गर्नुभयो ।’ वैशाखी टेकेर पत्रकार सम्मेलनमा उपस्थित भएका सापकोटाले रुँदै भने,‘दोषीलाई कारबाही गर्नुपर्छ । दिनदाहाडै यस्तो गलत र गैरकानुनी काम गर्नेलाई कुनै पनि हालतमा छुट दिनुहुँदैन । फिल्डबुकमा तिलमायाको नाम हटाएर मेरो परिवारको नाम राख्नुपर्छ ।’

एक बिघा ९ कठ्ठा जग्गा रहेकोमा अहिले ९ कठ्ठाको मात्रै जग्गाधनी पूर्जा आफूसँग रहेको उनले सुनाए । ‘एक बिघा जग्गा चाहीँ श्रेष्ठले जालसाँझी गरेर विवाह गरेर दिएकी बहिनी तिलमायाको नाममा फिल्डबुकमा चढाएको छ’ उनले भने । आफू बाल्यकालदेखि कुष्ठरोगी भएकोले अस्पताल धाउनुपर्ने बाध्यता रहेको सापकोटाको भनाइ छ । ‘म त बिरामी हुँ, त्यही भएर धेरैजसो समय घर बाहिर भएँ । श्रेष्ठले त्यसरी एक बिघा जग्गा बहिनीको नाममा फिल्डबुकमा चढाउँदा हामी ललितपुरको टिकाभैरवमा रहेको कुष्ठरोग अस्पतालमा थियौं’ सापकोटाले सुनाए ।

सापकोटा दम्पतीले वैशाखी टेकेर भए पनि आफूहरुको जग्गा अर्को व्यक्तिले जालसाँझी गरेर खान खोजेकोले न्याय माग्न निवेदन बोकेर वडा कार्यालय धेरैपटक धाएको बताए । तर, जग्गाको पूर्जा निकाल्न अनुरोध गर्दा न्याय दिनुको साटो वडाअध्यक्ष बालकुमार उप्रेतीले धम्की दिने गरेको उनीहरुको गुनासो छ ।  उनले भने,‘वडाअध्यक्ष उप्रेती जालसाँझी गर्ने श्रेष्ठसँग मिलेका छन् । मेरो जग्गा यसरी मिलेमतोमा खान खोजियो । वडाअध्यक्षले त तँ बढी न हो, तेरो गालामा पड्काइ दिन्छु भनेर धम्क्याउँने काम गरे ।’ उनीहरु वडाले न्याय नदिएपछि खैरहनी नगरपालिका पुगेर मेयर लालमणि चौधरीलाई भेटे । मेयरसँग अनुनय–विनय गर्दा पनि उनले पनि न्यायको लागि कुनै ठोस कदम नचालेको र उल्टै वडा कार्यालयमा पठाएको सापकोटा दम्पतीको गुनासो छ ।

उनले भने,‘न्यायको लागि मेयरले पनि राम्रो पहल गर्नुभएन । उहाँले खासै वास्ता गर्नुभएन । हामी न्याय खोज्दै मिडियासामू काठमाडौं आएका हौं । तपार्इँहरुले न्याय दिलाउनको लागि पहल गरिदिनुहोस् ।’ दसैलगत्तै आफूहरुले असुरक्षित महसुस गरेर घर छोडेको पनि उनीहरुले जनाए । हाल उनीहरु पर्सा वीरगन्जमा रहेको दिदी–भिनाजुको घरमा आश्रय लिएर बसेका छन् ।  सापकोटा दम्पतीको एक सन्तान छन् । उनीहरुको छोरा गणेश सापकोटा हाल काठमाडौं फर्पिङमा कुष्ठरोग निवारणले सञ्चालन गरेको स्कुलमा अध्ययनरत छन् ।

नारायणी अनलाइन

प्रतिक्रिया दिनुहोस्

सम्बन्धित समाचारहरू

बोलवम मेलामा आएका भक्तजनलाई देवघाटधाम जेसीजद्वारा निःशुल्क पानी र मही वितरण

देवघाट, साउन ७ देवघाटधाममा सुरु भएको बोलवम मेलामा आएका भक्तजनलाई देवघाटधाम जेसीजले निशुल्क पानी तथा

नेपाल कम्युनिष्ट पार्टीका संस्थापक महासचिव पुष्पलालको ४६ औँ स्मृति दिवस मनाइँदै

काठमाडौं, साउन ७ नेपाल कम्युनिष्ट पार्टीका संस्थापक महासचिव पुष्पलालको ४६ औँ स्मृति दिवस आज विभिन्न