२१ साउन, दमौली
लडेर मेरुदण्ड भाँचिएका शुक्लागन्डकी नपा–१ थप्रेकका ७१ बर्षीय बृद्ध आमबहादुर गुरुङको उपचारमा थप्रेक घर भई हाल बेलायतमा बस्ने नेपालीहरुले सहयोग गरेका छन् । गुरुङको उपचारकोलागि बेलायत बस्ने थप्रेकबासीहरुले दुई लाख ५० हजार रुपैयाँ पठाएका छन् । सो रकम बाहेक स्थानीय स्तरमा संकलित रकम सहित तिन लाख ३७ हजार ६ सय १२ रुपैयाँ बुधबार बृद्धका आफन्तलाई हस्तान्तरण गरिएको छ ।
शुक्लागन्डकी नपा –१ का वडा अध्यक्ष रविचन्द्र पौडेलले सो रकम हाल बृद्धको उपचार भईरहेको हरियो खर्क अस्पतालमा पुगेर बृद्धका आफन्तलाई हस्तान्तरण गरेका थिए ।
गुरुङ गत जेठ २९ गते घाँस काट्न जाने क्रममा बारीको कान्लाबाट लडेर घाईते भएका थिए । हालसम्म अविवाहित गुरुङ भाईको घरमा बस्दै आएका थिए । घाईते गुरुङको तत्काल उपचारकोलागि मणिपाल अस्पताल पोखरामा लगिएकोमा मणिपालबाट थप उपचारकोलागि ग्रान्डी अस्पताल काठमाडौं लगिएको थियो । ग्रान्डीमा केही दिन उपचार पश्चात हरियोखर्क अस्पताल पोखरामा ल्याई उपचार गरिएको वडा अध्यक्ष पौडेलले जानकारी दिए ।
बृद्धको उपचारमा सहयोगको लागि हाल बेलायतमा बस्दै आएका पुर्णविर गुरुङको अगुवाईमा रकम संकलन गरि दुई लाख ५० हजार पठाएको वडा अध्यक्ष पौडेलले जानकारी दिए ।