२८ साउन, देवघाट
तनहूँको देवघाट गाउँपालिकामा समुदायका दुई जनालाई व्यक्तिलाई कोरोना पुष्टि भएपछि एक साताको लागि गाउँपालिका सिल हुने भएको छ । भरतपुर अस्पतालको कोभिड–१९ प्रयोगशालामा गरिएको प्रयोगशालामा गरिएको परिक्षणमा देवघाटका ५४ र ३० वर्षका दुई पुरुषलाई कोरोना पुष्टि भएको थियो ।
संक्रमित दुबै जना समुदायका व्यक्ति रहेका छन् । ५४ वर्षीय पुरुष देवघाटमै रहेका थिए भने ३० वर्षीय हालै मात्र काठमाडौंबाट आएका थिए । उनीहरुको सम्पर्कमा आएका ५० जनाको कन्ट्याक्ट ट्रेसिङ गरिएको देवघाट गाउँपालिकाका स्वास्थ्य संयोजक प्रदिप बुढाथोकीले बताए ।
देवघाट गाउँपालिकाको कोभिड समितिले बुधबार एक साताकोलागि गाउँपालिका सिल गर्न प्रशासनमा सिफारिस गरेको छ ।
समुदायका व्यक्तिलाई कोरोना संक्रमण पुष्टि भएपछि सर्वसाधरणलाई कोरोनाबाट जोगाउन विहिबारदेखी एक साताकोलागि गाउँपालिका सिल गर्ने निर्णय गरि कार्यान्वयनकोलागि जिल्ला स्तरीय कोभिड समितिमा सिफारिस गरिएको गाउँपालिकाका प्रमुख प्रशासकीय अधिकृत रमेश सुवेदीले बताए ।
सहायक प्रमुख जिल्ला अधिकारी चित्राङ्गत बरालले गाउँपालिकाका सिफारिस अनुसार गाउँपालिका सिल गर्ने बारेमा विहिबार निर्णय हुने बताए । बुधबार प्रमुख जिल्ला अधिकारी सदरमुकाम भन्दा बाहिर रहेको कारण लिखित निर्णय नभएको तर गाउँपालिकाको सिफारिस अनुसार नै सिल गरिने सहायक प्रजिअ बरालले बताए ।
सहायक प्रजिअ बरालले गाउँपालिका सिल गर्ने बारेमा बुधबार नै नेपाल प्रहरी र सशस्त्र प्रहरीलाई जानकारी गराई सोही अनुसार परिचालनकोलागि निर्देशन दिई सकिएको बताए ।
