अधिकांश कार्यकर्ता मागः सर्वेन्द्र खनाललाई उम्मेबार बनाईयोस्
देवघाट अनलाइन
दमौली, चैत १६
नेपाली काँग्रेसले उम्मेदवार छनौट गरिसक्दा एमालेले भने बल्ल उम्मेदबारको आकांक्षीको नाम संकलन गरेको छ । विहिबार पार्टी कार्यालय दमौलीमा बसेको क्षेत्रीय कमिटिको बैठकले आकांक्षी ६ जनाको नाम जिल्ला कमिटि हुँदै प्रदेश कमिटिमा पठाउने निर्णय गरेको छ ।
बैठकमा नेपाल प्रहरीका पुर्व आईजिपी सर्वेन्द्र खनाल, केन्द्रीय सहकारी विभागका सदस्य परितोष पौडेल, केन्द्रीय उद्योग विभागकी सदस्य सोभा गुरुङ्ग, प्रदेश कमिटिका सदस्य रामबहादुर गुरुङ्ग, जिल्ला सल्लाहाकार मोहन सुनार र भानुका कार्यकर्ता किरण धितालले उम्मेबारकोलागि कमिटिमा नाम टिपाएका छन् । बैठकले उनीहरुको नाम वर्णानुक्रमको आधारमा माथिल्लो कमिटिमा सिफारिस गर्ने निर्णय गरेको थियो ।
बैठकमा अधिकांश सहभागीले नेपाल प्रहरीका पुर्व महानिरिक्षक खनाललाई सर्वसम्मतीको आधारमा उम्मेदबार बनाउनु पर्ने माग गरेपनि क्षेत्रीय कमिटिले आकांक्षीहरु सबैको नाम माथिल्लो कमिटिमा पठाउने निर्णय गरेको थियो ।
उम्मेदबारको रुपमा नाम टिपाएका भानुका किरण धितालले सर्वेन्द्र खनालको पक्षमा आफ्नो उम्मेदबारी फिर्ता लिने जानकारी दिएका थिए । यसपटक पार्टीले योग्य उम्मेदबार बनाउनु पर्ने भन्दै अधिकांश सहभागीले सर्वेन्द्र खनालको पक्षमा धारणा राखेका थिए । भानु, आवुँखैरेनी, देवघाट र बन्दिपुर तथा व्यासका अधिकांश सहभागीले ६ जना विच सहमती नभए मतदानको प्रक्रियाबाट भएपनि एक जनाको नाम मात्रै सिफारिस गर्नु पर्ने माग गरेका थिए ।
