देवघाट अनलाइन
दमौली,चैत १८
नेकपा एमालेले तनहुँ क्षेत्र नम्बर १ मा हुने उपनिर्वाचनको लागि सर्वेन्द्र खनाललाई उम्मेदबार बनाउने भएको छ । नेकपा एमालेको शनिबार बसेको केन्द्रिय सचिवालयको बैठकले खनाललाई उम्मेदबार बनाउने निर्णय गरेको उपमहासचिव तथा प्रचार विभागका प्रमुख पृथ्विसुब्बा गुरुंगले जानकारी दिए ।
एमालेबाट उम्मेदबार बन्न लागेका खनाल नेपाल प्रहरीका पुर्व महानिरिक्षक हुन् । उनी नेपाल प्रहरीको २६ औँ महानिरीक्षक हुन् । उनलाई २०७४ चैत्र २६ गते बसेको नेपालको मन्त्री परिषदको बैठकले प्रहरी नायव महानिरीक्षकबाट प्रहरी महानिरीक्षक पदमा बढुवा गरेको थियो । खनालले चैत २९ गतेबाट कार्यभार सम्हालेका थिए । खनाल २०७९ असोज ६ गते नेकपा (एमाले) मा प्रवेश गरेका थिए । गत निर्वाचनमा खनाल काठमाडौं क्षेत्र नम्बर ६ बाट नेकपा एमालेको उम्मेदबार बनेका थिए । सो निर्वाचनमा खनाल राष्ट्रिय स्वतन्त्र पार्टीका शिशिर खनालसँग पराजित भएका थिए ।
खनालको जन्मस्थान भानु नपा–६ सिम्पानी हो । तनहुँ क्षेत्र नम्बर १ मा गत प्रतिनिधि सभाको निर्वाचनमा नेकपा एमालेका एकबहादुर रानाले १९ हजार ९८१ मत प्राप्त गरेका थिए ।
