देवघाट अनलाईन
दमौली, चैत २०
नेपाली काँग्रेसका नेता गोविन्दराज जोशीले आफ्नो कारवाही फुकुवा गर्ने पार्टीको केन्द्रिय कार्यसम्पादन समितिको निर्णयलाई बकम्फुसे कुरा भएको टिप्पणी गरेका छन् । आईतबार बसेको काँग्रेस केन्द्रीय कार्य सम्पादन समितिको बैठकले जोशी सहित चितवनका पुर्व सभापती विकास कोईरालाको कारवाही फुकुवा गर्ने निर्णय गरेको सार्वजानिक भएको थियो ।
आफुलाई गरिएको कारवाही फुकुवा भएको भनी सन्चारमाध्यममा प्रकाशित समाचार प्रति जोशीले असहमती जनाउँदै उक्त निर्णय चुनावको मुखमा गरिएको मन्चन मात्र भएको बताएका छन् । नेपाली काँग्रेसका पुर्व सहमहामहामन्त्री समेत रहेका जोशीले सोमबार प्रेस विज्ञप्ति प्रकाशित गर्दै यो झुटको खेतीमा मलजल नगर्न र सम्पूर्ण सच्चा नेपाली कांग्रेसका समर्थकहरुलाई पार्टीको मूल्य र मान्यताबाट बिचलित भएर गरिएको निर्णयाधार बिनाका यस्ता बकम्फुसे कुराको पछि नलाग्न र सो निर्णयको घोर भत्र्सना गर्न समेत अनुरोध गरेका छन् ।
सामाजिक सन्जाल मार्फत सार्वजानिक भएको विज्ञप्तिमा जोशीले भनेका छन्–‘हिजो नेपाली कांग्रेसले गरेको निर्णय (जोशीको कारवाही फुकुवा) मा मेरो नाम पनि उल्लेख छैन । साथै २०७९ भन्दा अगाडि भएका निर्वाचनमा उठेका स्वतन्त्र उम्मेद्वारहरूलाई सहयोग गरेकाहरूले माफी मागेर यसपालि चुनावमा सहयोग गरेको खण्डमा कारबाही फुकुवा गर्ने भन्ने भ्रम छर्ने प्रयत्न गरिएको छ । हेक्का रहोस् हामी नव सामन्तीहरुको दास होइनौँ । बीपी कोइरालाको पार्टीलाई यो स्थितिमा पु¥याउने शेर बहादुर देउवा लगायतका झुण्डहरूले नेपाली कांग्रेसका सम्पूर्ण कार्यकर्ता सँग माफी माग्नु पर्छ । अनि मात्रै सच्चा कांग्रेसहरु प्रति न्याय हुन्छ ।’
‘नेपाली काँग्रेसले हिजो मञ्चन गरेको नाटकमा न त कथा वस्तु राम्रो छ न त त्यसमा अभिनय गर्ने पात्रहरू नै । पार्टीले गरेको झुटो निर्णयमा सरोकारवाला र जानकार भएर पनि चुप लाग्ने र कुर्सी मोहका लागि गलतलाई गलत हो भन्न नसक्ने, बोल्नु पर्ने ठाउँमा चुँ समेत नगर्ने नेपाली कांग्रेसका युबा नेताहरुको हैसियत र काम गर्ने क्षमता देख्दा दयाभाव जागेको छ । साथै यस्तो नेतृत्वले देशको कस्तो खाका कोर्ने हो भन्ने चिन्ता पनि लागेको छ ।’ जोशीले भनेका छन् ।
जेशीले विज्ञप्तिमा भनेका छन्–‘भनिन्छ जब राजनीतिमा विचलन आउँछ, तब झुटको खेति गरिन्छ । १२ बुँदे सहमति पछि नेपाली कांग्रेसले केवल झुटको खेती गर्दै देशलाई तहसनहसको बाटो तर्फ उन्मुख गरेको कुरा जनतासामु प्रष्ट नै छ । अतः सबै भन्दा ठूलो कुरा देश हो । देश रहे मात्रै पार्टी रहन्छ । पार्टी रहे राजनीती गरुँला । मैले मेरो ब्यक्तिगत फाइदाको लागि निर्वाचनमा होमिनु पर्ने कुनै आवश्यकता छैन । आज देश नाजुक स्थितिमा पुगेको छ । सबै मिलेर देशको रक्षा गर्न पर्ने बेला आएको छ ।’
जोशीको कारवाही फुकुवा भएको हुँदा अव जोशी नेपाली काँग्रेसका उम्मेदबार गोविन्द भट्टराईको प्रचारमा हिड्ने आशा गरेका काँग्रेसका कार्यकर्तालाई जोशीको विज्ञप्तिले निराश बनाएको छ ।
