दमौली, असार १३
व्यास नगरपालिकाको स्वास्थ्य शाखाले दमौली अस्पतालमा गर्भवती महिला तथा बालबालिकाहरुको लागि पोषिलो खाना प्रवद्र्धन तथा प्रदर्शनी कार्यक्रम गरेको छ । मातृ शिशु स्वास्थ्यमा सुधार, सुरक्षित प्रसूति सेवामा पहुँच बढाउने र कुपोषण न्यूनीकरणका लागि कार्यक्रम गरिएको व्यास नगरपालिकाका स्वास्थ्य शाखा प्रमुख प्रमोद सोतीले बताए ।
स्तनपान गराउने, सुत्केरी र गर्भवती महिलालाई पोलिस नगरेको चामल, अण्डा, गेडागुडी तथा क्वाँटी, शुद्ध तोरीको तेल, हरियो तरकारी तथा सागपात, फलफुल, सर्वोत्तम पिठो, ज्वानोलगायतका खाद्य सामाग्री प्रर्दशनीमा राखिएको थियो ।
यस्तै बालबालिकाहरुलाई सर्वोत्तम पिठो, अण्डा, केरा, तरकारीलगायत सामाग्री प्रर्दशनीमा राखिएको थियो । पोषणयुक्त खानेकुराको सही मिश्रणले मात्रै राम्रो नतिजा दिने सोतीले बताए । बालबालिका तथा गर्भवती महिलालाई खानेकुरा दैनिक रुपमा मिलाएर खाने तरिकाका बारेमासमेत प्रदर्शनीमा जानकारी गराईएको थियो ।
