भरतपुर, भदौ ७
राष्ट्रिय स्वतन्त्र पार्टी (रास्वापा) ले यही भदौ १० गते चितवमा पहिलो सार्वजनिक सुनुवाइ गर्ने भएको छ ।
जनताप्रति प्रत्यक्षरुपमा जवाफदेही बन्न भन्दै रास्वपाले सार्वजनिक सुनुवाइ गर्न लागेको जानकारी सभापति रवि लामिछानेले दिएका छन् ।
यस कार्यक्रममा आफ्ना समस्या, सुझाव र गुनासा लिएर आउन पनि उनले आग्रह गरेका छन् । ‘हामीले उद्घोष गरे अनुसार यही भदौ १० गते चितवनमा प्रथम सार्वजनिक सुनुवाइ हुन गइरहेको छ। जनप्रतिनिधि जनताप्रति प्रत्यक्ष रूपमा जवाफदेही हुनुपर्छ भन्ने मान्यताका साथ शुरू हुन गइरहेको यस कार्यक्रममा सम्पूर्ण चितवनवासीले आफ्ना समस्या, गुनासो र सुझावहरू लिएर आइदिनुहोला’ लामिछानेले सामाजिक सञ्जालमा लेखेका छन्, ‘यो कार्यक्रम जनसरोकारको विषयमा गरिएको र यसमा राज्य र समाजका सबै सरोकारवाला पक्षहरूको प्रतिनिधित्व हुने भएकोले कार्यक्रममा पार्टीको झण्डा, ब्यानर, लोगो वा पोसाक नलगाइदिनु हुन अनुरोध छ ।’
रवि गत निर्वाचन र उपनिर्वाचनमा चितवन २ बाट निर्वाचित भएका थिए ।
