दमौली, भदौ २३
व्यास नगर साइनिङ स्टार–२०२३ को उपाधि सत्यवती माविकी छात्रा सदिक्षा रानामगरले चुमेकी छिन् । जेसिआई व्यास नगरले आयोजना गरेको साइनिङ स्टार–२०२३ को शुक्रबार राती सम्पन्न भएको फाईनल प्रतियोगितामा सहभागी १९ जना प्रतिस्पर्धीलाई पछि पार्दै रानाले उक्त उपाधि चुम्न सफल भएकी हुन् ।
उपाधि बिजेता रानाले २५ हजार २३ नगद पुरस्कार तथा प्रमाणपत्र प्राप्त गरेकी छन् । त्यसैगरी आभा श्रेष्ठ फस्ट रनरअप तथा सदिक्षा थापा मगर सेकेण्ड रनरअप भईन् । उनीहरुले क्रमश १५ हजार २३ र १० हजार २३ नगद पुरस्कार र प्रमाणपत्र प्राप्त गरे । सो प्रतियोगितामा १० बर्ष माथिका र १५ बर्ष मूनिका दुई बालक सहित बीस जना बालबालिका सहभागि भएका थिए ।
बालबालिकाको प्रतिभा प्रस्फुटनका लागि जेसिआई व्यास नगरले उक्त प्रतियोगिताको आयोजना गरेको हो । बालबालिकाको नेतृत्व विकास, शारीरिक तन्दुरुस्ती कला संस्कृति लगायतका क्षेत्रमा जोड दिदै आएको जेसी आई व्यास नगरका महासचिव सुनिल श्रेष्ठले जानकारी दिए ।
बालबालिकाहरुलाई विभिन्न प्रशिक्षकबाट एक महिनासम्म तालिम प्रदान गरी प्रतियोगितामा सहभागि गराइएको थियो । सो कार्यक्रममा व्यास नगरप्रमुख बैकुण्ठ न्यौपाने जेसिआई व्यास नगरका अध्यक्ष राजु राना लगायतकाले बिजयी प्रतियोगीहरुलाई पुरस्कार र प्रमाणपत्र प्रदान गरेका थिए ।
