दमौली, मंसिर २०
केही दिन अघि सरुवा भएका जिल्ला ट्राफिक प्रहरी कार्यालय तनहुँका प्रमुख प्रहरी वरिष्ठ नायव निरिक्षक राजिव विष्टको बिदाई गरिएको छ ।
जिल्ला प्रहरी कार्यालय तनहुँका प्रमुख अबदेश विष्ट लगायत ट्राफिक प्रहरी मातहतका अधिकृत तथा जवानहरुले बुधबार विष्टलाई बिदाई गरेका हुन् । विष्टको तत्कालको लागि जिल्ला ट्राफिक प्रहरी कार्यालय कास्कीमा सरुवा भएको छ ।
तनहुँमा करिब १४ महिनाको बसाईको क्रममा विष्टले सवारी नियम कार्यान्वयनमा उल्लेख्य कार्य र सुधार गरेका थिए । उनको कार्यकालमा जिल्ला ट्राफिक प्रहरी कार्यालयले हालसम्मको सबैभन्दा धेरै ४ करोड भन्दा बढि राजश्व संकलन गर्न सफल भएको थियो ।
त्यस्तै विष्टको कार्यकालमा पहिलोपटक तनहुँमा मापसे गर्ने सवारी चालकलाई अनिवार्य कक्षा लिनुपर्ने व्यवस्था सुरु गरिएको थियो । मापसे चेकिङलाई कडाई, राजश्व असुलीमा बैंकिङ प्रणाली लागू, लामो दुरीका सवारीसाधनको लागि आबुँखैरेनीमा डबल चालक दर्ता गर्नुपर्ने प्रावधान पनि विष्टको कार्यकालमा सुरु गरिएको थियो ।
बिदाई कार्यक्रममा विष्टले तनहुँ बसाईको क्रममा आफुलाई जिल्लाबासीको तर्फबाट प्राप्त सहयोग प्रति आभार व्यक्त गरे ।
विष्टको सरुवा पछि तनहुँमा ट्राफिक प्रमुखको रुपमा प्रहरी नायव निरिक्षक सन्तोष पौडेल आएका छन् ।
