देवघाट, मंसिर २४
देवघाट गाउँपालिकाले वडा स्तरबाट योजनाहरुको सम्झौता र योजना कार्यान्वयन सम्बन्धी अभिमुखीकरण कार्यक्रम सन्चालन गरेको छ । गाउँपालिकाका पाँच वटै वडामा गई योजना सम्झौता गरि उपभोक्ता समितिलाई योजना कार्यान्वयनकोलागि अभिमुखीकरण तालिम दिइने गाउँपालिकाका प्रमुख प्रशासकीय अधिकृत गौरीप्रसाद आचार्यले जानकारी दिए । उक्त कार्यक्रम आइतबार वडा नम्बर ४ बाट सुरु गरियो ।
चालु आर्थिक वर्ष ०८०÷८१ मा विभिन्न वडामा कार्यान्वयन हुने योजनाको सम्झौता तथा योजना सन्चालन सम्बन्धमा उपभोक्ता समितिका पदाधिकारीलाई अभिमुखीकरण तालिम तथा अन्तरक्रिया समेत गर्नको लागि गाउँपालिकाका प्रमुख प्रशासकीय अधिकृतको नेतृत्वमा सम्बन्धित शाखाका कर्मचारीहरु समेतको सहभागितामा कार्यक्रम गरिने गाउँपालिकाका प्रमुख प्रशासकीय अधिकृत आचार्यले बताए ।
आइतबार वडा नम्बर ४ मा आयोजित योजना सम्झौता तथा अभिमुखीकरण कार्यक्रममा गाउँपालिकाका उपाध्यक्ष भुवनसिंह गुरुङ, प्रमुख प्रशासकीय अधिकृत गौरी प्रसाद आचार्य, प्रशासन शाखा प्रमुख गोविन्दप्रसाद पौडेल, योजना शाखा प्रमुख रामप्रसाद सापकोटा, कार्यक्रम अधिकृत कृष्णराज पन्थ, स्वास्थ्य शाखा प्रमुख प्रदिप बुढाथोकी, ईन्जिनियर तिर्थ ढुंगाना, ईन्जिनियर श्याम सुवेदी लगायतको विभिन्न शाखाका कर्मचारीहरुको सहभागिता रहेको थियो ।
उक्त कार्यक्रममा आउँदा योजना सम्झौताको लागि उपभोक्ता भेला, समिति गठन, वडाको सम्बन्धीत प्राविधिकबाट इष्टमेट तयारी, उपभोक्ता समितिले बेहोर्नु पर्ने तोकिए बमोजिमको लागत सहभागिता लगायतका सबै प्रक्रिया पुरा गर्नु पर्ने गाउँपालिकाले जनाएको छ ।
