देवघाट, पुस २५
देवघाट गाउँपालिकाको अपाङ्गता सरोकार समितिका अध्यक्ष कुमार पाण्डेले अपाङ्गता भएका व्यक्तिहरुको अधिकार कार्यान्यनको माग गरेका छन् । मंगलबार आयोजित गाउँपालिकाको १३ औं गाउँसभा अघि पाण्डेले गाउँसभाले अपाङ्गता भएका व्यक्तिहरुको हितमा कार्यक्रम ल्याउन माग गरेका हुन् ।
अपाङ्गता भएका व्यक्तिहरुको लागि विनियोजित कार्यक्रम पनि वडा कार्यालयको असहयोगको कारण कार्यान्वयन नभएको भन्दै पाण्डेले अपाङ्गता भएका व्यक्तिहरुको अधिकार र उनीहरुको क्षेत्रमा गाउँपालिकाले पारित गरेको कार्यक्रमहरु सबै कार्यान्वयन गर्नु पर्ने बताए ।
गाउँपालिकामा अपाङ्गता सरोकार समिति गठन गरिएपनि त्यसपछि कुनै समन्वय र सहकार्य पनि नभएको पाण्डेले बताए । अपाङ्गता भएका व्यक्तिलाई कानुन अनुसारको सेवा, सुविधा र अवसरको माग गर्दै शारीरिक अपाङ्गता भएका पाण्डेले अपाङ्गता भएका व्यक्तिको अधिकारसम्बन्धी ऐन, २०७४ अनुसार राज्यले निर्माण गरेको अपाङ्गता भएका व्यक्तिको अधिकारसम्बन्धी नियमावली, २०७७ अनुसारको सेवा सुविधा र अवसर उपलब्ध गराउनु पर्ने बताए ।
पाण्डेका अनुसार देवघाट गाउँपालिकामा ३०३ जना अपाङ्गता भएका व्यक्ति छन् । त्यसमध्ये क र खका १२६ जना र ग र घ का १७७ जना अपाङ्गता भएका व्यक्तिहरु रहेका छन् । वडा कार्यालयले अपाङ्गता सम्बन्धि कुनै कार्यक्रम पनि नगर्दा गत आर्थिक वर्षमा सबै बजेट फ्रिज भएर गएको पाण्डेले जानकारी दिए ।
वडा नम्बर ५ का अध्यक्ष एवं गाउँपालिकाका प्रवक्ता पुर्णबहादुर कुँवरले चालु आर्थिक वर्षमा अपाङ्गता सम्बन्धी कार्यक्रम समन्वय गरेर सम्पन्न गर्ने प्रतिबद्धता जनाए । गत बर्ष बजेट फ्रिज भएर जानु दुखद भएको भन्दै उहाँले यसवर्ष त्यस्तो हुन नदिने बताए ।
