दमौली, पुस २६
व्यास नपा-२ निवासी दलित अधिकारकर्मी रामलिला सुवर्णकारको निधन भएको छ । सुर्वणकारको बुधबार राती आफ्नै निवासमा निधन भएको हो ।
सुवर्णकार जातिय मुक्ति आन्दोलनका नेता समेत हुन् । जातिय विभेद विरुद्धको आन्दोलनमा सुवर्णकारको महत्त्वपूर्ण योगदान रहेको छ । गैरसरकारी संस्था महासंघ तनहुँका पुर्व अध्यक्ष समेत रहेका उनी संयुक्त दलित उत्थान मन्च तनहुँका अध्यक्ष हुन् ।
उनी विभिन्न संघ संस्थामा आबद्द रहेका थिए । उनी दलित वर्ग उत्थान जिल्ला समन्वय समिति तनहुँका पुर्व उपाध्यक्ष आदिकवि भानुभक्त क्याम्पसका पुर्व सन्चालक समितिका सदस्य तथा मानवअधिकार निगरानी समूह तनहुँका पुर्व अध्यक्ष समेत हुन् । उनी निबृत्त शिक्षक हुन् ।
नेकपा एमाले तनहुँका पुर्व जिल्ला कमिटी सदस्य सुवर्णकारको पार्थिव शरिरमा नेकपा एमालेका केन्द्रीय सल्लाहकार एकबहादुर राना र एमाले तनहुँका अध्यक्ष श्रीप्रसाद श्रेष्ठले पार्टीको झन्डा ओढाएर अन्तिम श्रद्धाञ्जली अर्पण गरेका थिए । सुवर्णकारलाई अन्तिम श्रद्धाञ्जली दिन उनको निवास र सेतीमादी घाटमा ठूलो संख्यामा सर्वसाधारणको सहभागिता रहेको थियो । सुवर्णकारको दमौली स्थित सेतीमादी घाटमा विहिबार बिहान अन्तिम संस्कार गरियो ।
दिवंगत सुवर्णकारका पत्नि, १ छोरा र १ छोरी छन् । उनका छोरा मनोज सु्वर्णकार सुनचाँदी व्यवसायी हुन् ।
