दमौली, पुस २९
नेकपा एकीकृत समाजवादी पार्टी तनहुँ जिल्ला सचिवालय सदस्य एवं शुक्लागण्डकी नगर कमिटी सचिव डिलबहादुर थापाको नेतृत्वको टोली नेकपा एमालेमा फर्किएका छन् । थापाको नेतृत्वमा सो पार्टीका विभिन्न तहमा रहेका नेता तथा कार्यकर्ताहरु आइतबार नेकपा एमालेमा समाहित भएका हुन् ।
उनीहरुलाई नेकपा एमालेका उपमहासचिव पृथ्वीसुब्बा गुरुङ, गन्डकी प्रदेश कमिटिका सचिव धनन्जय दवाडी लगायतले पार्टीमा स्वागत गरे । नेकपा एमाले शुक्लागण्डकी नगर कमिटीले आइतबार बेलचौतारामा आयोजना गरेको कार्यक्रममा उनीहरु एमालेमा समाहित भएका हुन् । एमालेमा फकर्नेहरुमा नगर कमिटि सदस्य, वडा कमिटि सदस्य, युवा संघका जिल्ला सदस्य तथा नगर कमिटिका सदस्यहरु रहेका छन् ।
पार्टीमा समाहित भएपछि थापाले आफ्नो घर फर्कन पाउँदा निकै खुसी लागेको बताए । उनले पार्टीले दिने जिम्मेबारी पुरा गर्ने प्रतिबद्धता जनाएका छन् ।
नेकपा एमाले शुक्लागन्डकी नगर कमिटिका अध्यक्ष मुक्तिनाथ तिमिल्सेनाको अध्यक्षतामा सो कार्यक्रम सम्पन्न भएको थियो ।
