दमौली, माघ २५
आदिकवि भानुभक्त आचार्यको नाममा तनहुँमा स्थापना भएको सामुदायिक क्याम्पस आदिकवि भानुभक्त क्याम्पस विज्ञानचौर, व्यास नपा–१ दमौलीको शैक्षिक एवं भौतिक विस्तार र विकासका लागि आदिकवि भानुभक्त जन्मस्थल विकास समितिले आर्थिक सहयोग गरेको छ ।
विकास समितिले विहिबार क्याम्पसलाई ३३ हजार ३ सय ३३ रुपैयाँ नगद सहयोग प्रदान गरेको छ । समितिका कार्यकारी निर्देशक शंकर रानाभाटले विहिबार क्याम्पसमा आई उक्त रकमको चेक क्याम्पस प्रमुख महाप्रसाद हड्खलेलाई हस्तान्तरण गरे ।
सो अवसरमा सहायक क्याम्पस प्रमुख द्वय डाक्टर रामकुमार अधिकारी, सागर पौडेल र विज्ञान तथा प्रविधि विभागका प्रमुख राजन घिमिरेको उपस्थिति रहेको थियो । २०७२ सालमा क्याम्पसले सञ्चालन गरेको तनहुँ आदिकवि आदिकवि भानुभक्त धार्मिक एवं शैक्षिक महोत्सवका अवसरमा उक्त समितिले प्रतिबद्धता जनाएको सो रकम समितिको हालै बसेको बैठकले क्याम्पसलाई भुक्तानी दिने निर्णय गरेको थियो ।
सो अवसरमा क्याम्पस प्रमुख महाप्रसाद हड्खलेले सो प्रतिवद्धताको रकम भुक्तानी गरेकोमा समिति प्रति क्याम्पस परिवारको तर्फबाट आभार व्यक्त गरेका थिए ।
