दमौली, माघ २८
ब्यास नपा–१४ को नवनिर्मित भवनको बोर्डमा मगर लिपिले लेखिएको छ । हालै निर्माण सम्पन्न भएको उक्त वडाको भवन आगामी फागुन २ गते उद्घाटन हुने भएको छ ।
साविक केशवटार हाल व्यास नपा वडा नम्बर १४ मा बहुसंख्यक मगजातीका बासिन्दा बसोबास गर्छन् । वडा सदस्य दुर्गाबहादुर आलेका अनुसार उक्त वडाका नागरिक मध्ये करिब ९२ प्रतिशत मगरहरू रहेका छन् ।
मगरजाती र मगरभाषीको सम्मान र उनीहरुको पहिचानका लागि वडा कार्यालयको बोर्डमा मगर भाषाको लिपी सहितको भित्ते लेखन गरिएको वडा अध्यक्ष काजिमान श्रेष्ठले बताए । स्थानीय भाषाको लिपिमा बोर्ड लेखिएको व्यास नपा १४ तनहुँको पहिलो वडा हो ।
