दमौली, साउन १
आदिकवि भानुभक्त क्याम्पसले थप ६ जना प्राध्यापक तथा कर्मचारीलाई स्थायी नियुक्ती दिएको छ । क्याम्पस सन्चालक समितिले मंगलबार १ जना सह–प्राध्यापक, ४ जना उपप्राध्यापक र १ जना करार सेवाका कर्मचारीलाई स्थायी नियुक्ती दिएको हो ।
स्थायी नियुक्ती पाउनेहरुमा सहप्राध्यापक डा.शुशिलप्रसाद वाग्ले, उप–प्राध्यापकहरु विमल गिरी, चिज कुमार श्रेष्ठ, गजेन्द्र पौडेल, विमल खत्री र कार्यालय सहायक (खरीदार) रस्वती दरै रहेका छन् ।
क्याम्पस सेवा आयोगबाट सञ्चालन गरिएको खुल्ला तथा आन्तरिक प्रतिस्पर्धाबाट छनोट एवं सिफारिस भई क्याम्पस सञ्चालक समितिको निर्णयले आन्तरिक बढुवा भई उनीहरुले स्थायी नियुक्ती पाएको क्याम्पस प्रमुख महाप्रसाद हडखलेले बताए ।
सो अवसरमा क्याम्पस सञ्चालक समितिका अध्यक्ष बुद्धिमान श्रेष्ठ र क्याम्पस प्रमुख महाप्रसाद हड्खले लगायतले नियुक्तिपत्र प्राप्त गर्ने सबैजनालाई बधाई ज्ञापन गरेका थिए ।
यससँगै आदिकवि भानुभक्त क्याम्पसमा स्थायी हुने प्राध्यापकको संख्या २३ पुगेको छ । जसमध्ये सहप्राध्यापक पदमा ६ जना र उप–प्राध्यापक पदमा १७ जना संख्या पुगेको छ । त्यस्तै करार उपप्राध्यापक १ जना, पूर्णकालिन अस्थाई सहायक प्राध्यापकको संख्या १० जना र पूर्णकालिन शिक्षण सहायक १ जना रहेका छन् ।
त्यसैगरि आंशिक सहायक प्राध्यापक (कोर्स करार) को संख्या २० जना रहेको छ । आंशिक करार शिक्षण सहायक ३ जना रहेका छन् । क्याम्पसमा जम्मा प्राध्यापकहरूको दरबन्दी ५८ कायम रहेको छ भने कर्मचारी तर्फ १७ दरबन्दी कायम रहेको क्याम्पस प्रमुख खड्खलेले बताए ।
