दमौली, साउन २०
पुर्व कृषि मन्त्री पद्मा अर्यालले व्यास नपा–५ मा सन्चालित माँ अम्बे अलौकिक कृषि फर्मको आइतबार अवलोकन गरेकी छिन् । महिला उद्यमी कल्पना गौलीद्वारा सन्चालित उक्त कृषि फर्मको अवलोकन गर्दै पुर्व मन्त्री अर्यालले कृषि फर्मको थप योजना सुन्दा, ड्रागन फ्रुटको फल तथा उत्पादीत विरुवा देख्दा अत्यन्त खुसी लागेको बताइन् ।
परिश्रममा विश्वास गर्ने कल्पनाको व्यवसायीक संघर्ष त यस अघि नै देखेको भन्दै अर्यालले कृषि क्षेत्रमा लागेर राज्यको सहयोग बिनै अर्गानिक उत्पादन तथा उत्पादित वस्तुको बजार व्यवस्थापन जस्ता चुनौतीपुर्ण काम गरेकोमा फर्मकी सन्चालक गौलीको प्रसंशा गरिन् । कल्पनाको आँट र हिम्मतलाई सम्मान गर्दै यसले श्रमजिवी समुदायको लागी प्रेरणाको श्रोत बन्नेमा विश्वास गरेको बताइन् ।
कल्पनाले व्यास नपा–५ को ढोडेनीमा जग्गा भाडामा लिएर दुई वर्ष देखी ड्रागन फ्रुट खेती गर्दै आएकी छिन् । भारतको हैदरावादबाट बिरुवा ल्याएको सि प्रजातीको सिउँडी फलको व्यवसायीक खेति गर्दै आएको सञ्चालिका गौलीले बताईन् ।
थोरै समयमा फल दिने र बजार मुल्य पनि राम्रै भएकाले यसको व्यवसायिक खेतीमा आफु आकर्षित भएको उनको भनाइ छ । अहिलेसम्म उनको उत्पादन स्थानीय बजारमै खपत भएको छ ।
संसारमा पाइने १ सय ५३ प्रजातीका ड्रागन फ्रुट्स मध्ये नेपालमा मात्र ५२ प्रजाती पाइने कल्पनाले बताइन् । उनले उत्पादन गरेको ड्रागन फ्रुट्स भने सिभेराइटी सिमरेड प्रजातीको हो । उन्नत जातको ड्रागन फ्रुट्स भित्राउने नेपालमा आफ्नो फर्म तेस्रो भएको उनले दावि समेत गरिन् ।
उचित स्याहार पाएमा यसले एक पटक रोपेपछी १५ देखि २० वर्ष सम्म उत्पादन दिन्छ । सुरुमा कौसी खेतीबाट कृषिमा लागेकी उनको लक्ष्य पूर्ण जैविक खेती हो । उनले कौसी खेती गर्दा पनि कहिल्यै रासायनिक मल प्रयोग गरिनन् । कौसीबाट उत्पादित सिजनका तरकारीहरु राम्रो विक्री हुन थालेपछी उनको जैविक खेती तर्फ आकर्षण बढेको हो ।
पुर्वमन्त्री अर्यालले आफ्नो फर्मको निरिक्षण गरि सुझाव दिएपछि आफुलाई निकै खुसी लागेको गौलीले बताइन् ।
