देवघाट, भदौ १९
प्रेस चौतारी चितवनले देवघाट गाउँपालिका–५ स्थित देवघाट समाज कल्याण केन्द्रद्वारा सन्चालित जेष्ठ नागरिक आश्रममा रहेका जेष्ठ नागरिकहरुलाई दर खुवाएको छ ।
हरितालिका तीज पर्वको अवसरमा बृद्धाश्रममा रहेका बुवा आमाहरुलाई दर खुवाईएको प्रेस चौतारी चितवनका अध्यक्ष सुभाष पण्डितले बताए । विभिन्न कारण र परिस्थितीको कारण घरपरिवारबाट टाढा रहनु परेका बृद्ध बुवा आमाहरुलाई वर्षको एक दिन चाडपर्वको अवसरमा दर खुवाई उहाँहरुको सुस्वास्थ्य र दिुर्घायुको कामना गरिएको अध्यक्ष पण्डितले बताए ।
उक्त कार्यक्रममा बोल्दै नेकपा एमाले चितवनका अध्यक्ष कमल पाठकले नेकपा एमाले र यसका भातृ संगठनहरु सँधै जेष्ठ नागरिकहरुको हकहित र पक्षमा लागिरहने बताए । हरितालिका तीजको अवसरमा प्रेस चौतारीले उदाहरणीय कार्य गरेर अत्यन्तै राम्रो सन्देश दिएको अध्यक्ष पाठकले बताए ।
प्रेस चौतारी चितवनका अध्यक्ष सुभाष पण्डितको अध्यक्षतामा आयोजित सो कार्यक्रममा प्रेस चौतारी नेपालका केन्द्रीय सदस्य प्रकाशचन्द्र भट्टराई, पत्रकार महासंघ चितवनका सचिव दिपेन्द्र अधिकारी लगायतले मन्तव्य राखेका थिए । उक्त कार्यक्रममा प्रेस चौतारी चितवनमा आवद्ध प्रदेश तथा जिल्लाका पदाधिकारी र सदस्यहरुको सहभागिता रहेको थियो ।
देवघाट क्षेत्र विकास समिति अन्तर्गत सन्चालित उक्त बृद्धाश्रममा हाल ३३ जना बृद्धबृद्धाहरु आश्रीत रहेका छन् । सरकारी बृद्धाश्रम भएपनि उक्त आश्रम सन्चालनकोलागि संघीय, प्रदेश र स्थानीय सरकारबाट कुनै पनि सहयोग प्राप्त भएको छैन । विभिन्न दाता र सहयोगी महानुभावहरुबाट प्राप्त सहयोगले बृद्धबृद्धाको दैनिक भोजन र आवासको व्यवस्थापन हुँदै आएको बृद्धाश्रमकी व्यवस्थापक दिलमाया सापकोटाले जानकारी दिइन् ।
