देवघाट, भदौ २९
देवघाट गाउँपालिका–५ स्थित रातामाटे सुन्दरबस्ती टोल र देवपुर गाउँ सुधार टोलमा शनिबार बृहत सरसफाई गरिएको छ । नियमित सरसफाई प्रति टोलका उपभोक्तामा जागरण ल्याउन र लामखुट्टेको कारण लाग्ने डेंगु रोग नियन्त्रणको लागि सरसफाई गरिएको रातामाटे सुन्दरबस्ती टोलबिकास संस्थाका अध्यक्ष डा.सुरेन्द्रप्रसाद श्रेष्ठले बताए ।
वडा नम्बर ५ कै नमुना टोल बनेको रातामाटे सुन्दरवस्ती टोलमा प्रत्येक शनिबार नियमित रुपमा सरसफाई गरिँदै आएको अध्यक्ष डा.श्रेष्ठले बताए । रातामाटे सुन्दरबस्ती देवघाट वडा नम्बर ५ को नमुना गाउँ बन्नेमा स्वास्थ्य र सरसफाई प्रति टोलका नागरिकहरुको जागरण नै मुख्य रहेको अध्यक्ष श्रेष्ठले बताए ।
यसैगरि वडा नम्बर ५ स्थित देवपुर गाउँ सुधार समिती पनि शनिबार टोल क्षेत्रमा बृहत सरसफाई गरेको छ । उक्त टोलले पनि प्रत्येक शनिबार नियमित सरसफाईको कार्यक्रम गर्र्दै आएको देवपुर गाउँ सुधार समितिका अध्यक्ष सुकुलाल गुरुङले बताए ।
देशव्यापी रूपमा फैलिएको डेंगु रोग रोकथाम र नियन्त्रणको लागि टोल वरपर नियमित रुपमा सरसफाई गर्नु पर्ने अध्यक्ष गुरुङले बताए । उक्त सरसफाइ कार्यक्रममा देवपुर टोलका सबै घरका नागरिकहरु उपस्थित थिए ।
