देवघाट । असार ३
देघवाट गाउँपालिकामा सवारी साधनको लागि इन्धनमा लाखौं रुपैयाँ अनियमित रुपमा खर्च गरिएको पाईएको छ । गाउँपालिकामा सरकारी सवारी साधन हुँदाहुँदै थप दुई वटा सवारी साधन भाडामा लिएर उक्त दुई वटा सवारी साधनलाई एक वर्षमा इन्धनमा मात्र ५ लाख १५ हजार ८७१ रुपैयाँ उपलब्ध गराईएको छ ।
महालेखा परिक्षकको कार्यालयले गरेको आर्थिक वर्ष २०८०/०८१ को लेखापरिक्षण प्रतिबेदन अनुसार देवघाट गाउँपालिकाले सवारी साधनको इन्धनमा उक्त ५ लाख १५ हजार ८७१ रुपैयाँ अनियमित रुपमा खर्च गरेको छ ।
गन्डकी प्रदेशको खर्च मापदण्ड २०७९ को दफा १७ (४) अनुसार सरकारी कामको लागि मात्र सवारी साधन प्रयोग गर्नुपर्ने हुन्छ । साथै प्रत्येक सवारी साधनको प्रयोगको लगबुक राखी सम्बन्धित पदाधिकारीले प्रमाणित गर्नुपर्ने हुन्छ । देवघाट गाउँपालिको बा १ च ९०७५ र बा ६ च ८६०५ नम्बरको दुई वटा गाडी भाडामा लिई अनियमित रुपमा इन्धनमा खर्च गरेको पाईएको महालेखा परिक्षकको प्रतिबेदनले जनाएको छ ।
कार्यालयमा सरकारी गाडी हुँदाहुदै पनि भाडामा गाडी लिई इन्धन उपलब्ध गराएकोले दैनिक तथा मासिक कति परिमाणमा इन्धन खपत हुने हो सो को एकिन नगरि सम्झौता गरिएको पनि प्रतिबेदनमा उल्लेख छ ।
