तनहुँ । असोज २७
जिल्ला प्रसासन कार्यालय तनहुँमा आइतबारदेखी राष्ट्रिय परिचयपत्रको सेवा सुरु भएको छ । गत भदौ २४ गते जेन जीको आन्दोलनमा आगजनीबाट क्षती भएको जिल्ला प्रशासन कार्यालयमा आइतबारबाट राष्ट्रिय परिचय पत्रको सेवा सुरु भएको हो ।
उद्योग वाणिज्य संघ तनहुँले २ लाख २० हजार रुपैयाँ खर्च गरि जिल्ला प्रशासन कार्यालयमा दुई वटा कोठा मर्मत सम्भार गरेपछि उक्त कोठाबाट राष्ट्रिय परिचय पत्रको सेवा सुरु भएको सहायक प्रमुख जिल्ला अधिकारी दिपक रेग्मीले बताए ।
राष्ट्रिय परिचय पत्रको सेवा सुरु भएपनि राहदानी विवरण संकलन कार्य भने अझै सुरु हुन सकेको छैन । राष्ट्रिय परिचय पत्रको सेवा सुरु भएपछि प्रशासन कार्यालयमा सेवाग्राहीको भिड लागेको थियो । राहदानी विवरण संकलन कार्य चाँडै सुरु गरिने सहायक प्रजिअ रेग्मीले बताए । जनताले तुरुन्त सेवा पाउन सकून् भन्ने उद्देश्यले काम निरन्तर अघि बढाइएको रेग्मीले बताए ।
तनहुँ उद्योग वाणिज्य संघले निर्माण गरेको जिल्ला प्रशासन कार्यालयको दुई वटा कोठाको चावी आइतबार संघका अध्यक्ष बैकुण्ठ मिश्रले प्रमुख जिल्ला अधिकारी रामकृष्ण अधिकारीलाई चाबी हस्तान्तरण गरेका थिए ।
