तनहुँ । असार १३
व्यास नगरपालिका–२ मा अतिक्रमणको चपेटामा परेको सार्वजनिक जग्गा खाली गराएर पार्कसहितको खुला व्यायामशाला निर्माण गरिएको छ । व्यास नपा २ को डाँग्रेखोल्सी क्षेत्रमा रहेको अतिक्रमणमा परेका करिब दुई रोपनी सार्वजनिक जग्गालाई संरक्षण गरी सो स्थानमा बगैँचासहितको खुला व्यायामशाला निर्माण भइरहेको हो ।
यसअघि अतिक्रमणको चपेटामा परेको उक्त जग्गालाई खाली गराई सम्याएर पर्खाल लगाई संरक्षण गरिएको व्यास नगरपालिका–२ का वडा सदस्य सुरेश वाग्लेले बताए । अहिले त्यही स्थानमा पार्क र खुला व्यायामशालाको निर्माण कार्य अन्तिम चरणमा पुगेको वाग्लेले बताए ।
चालु आर्थिक वर्ष २०८२/०८३ को वडागत विकास बजेट अन्तर्गत १५ लाख रुपैयाँ विनियोजन गरिएको छ । स्थानीयको लागत सहभागितासमेत जोड्दा आयोजनाको कुल लागत १६ लाख ५० हजार रुपैयाँ पुगेको छ ।
निर्धारित लागत अनुमान अनुसार नै योजना सम्पन्न गरिने तयारी गरिएको वडा सदस्य वाग्लेले जानकारी दिए । वाग्लेका अनुसार उक्त स्थानको त्रिआयामिक नमुना तथा योजना भूमिसमायोजन आयोजनाका वास्तुविद् मन्दिप श्रेष्ठले तयार गरेका हुन् ।
