तनहुँ । साउन ७
महर्षि वेदव्यासको जन्मभूमि मानिने तनहुँको दमौलीमा आगामी साउन ११ देखि १३ गतेसम्म तीनदिने ‘व्यास अवतरण तथा गुरु पूर्णिमा दिवस’ विविध कार्यक्रमका साथ मनाइने भएको छ ।
व्यास क्षेत्र शिवपाञ्चायन विकास कोषले बिहीबार दमौलीमा पत्रकार सम्मेलन आयोजना गरी महोत्सवका कार्यक्रमहरू सार्वजनिक गरेको हो । महर्षि वेदव्यासको योगदान, संस्कृत भाषा, वैदिक संस्कृति र व्यास जन्मभूमिको ऐतिहासिक महत्त्वलाई नयाँ पुस्तासम्म पु¥याउने उद्देश्यले कार्यक्रम आयोजना गरिएको कोषले जनाएको छ ।
पत्रकार सम्मेलनमा कोषका अध्यक्ष प्रेमप्रकाश भट्टराईले व्यास अवतरण दिवस धार्मिक पर्व मात्र नभई ज्ञान, दर्शन र नेपाली सभ्यताको संरक्षणसँग जोडिएको ऐतिहासिक अवसर भएको बताए । अध्यक्ष भट्टराईका अनुसार पहिलो दिन साउन ११ गते व्यास गुफास्थित सभाहलमा संस्कृत भाषाका लेख–रचना वाचन तथा महर्षि वेदव्यासको जीवन, कृतित्व र योगदानबारे विशेष प्रवचन सञ्चालन गरिनेछ ।
त्यस्तै दोश्रो दिन साउन १२ गते व्यास नगरपालिकाभित्रका माध्यमिक विद्यालयस्तरीय वक्तृत्वकला प्रतियोगिता आयोजना गरिनेछ । ‘महर्षि वेदव्यास र व्यास जन्मभूमि’ विषयक प्रतियोगितामा उत्कृष्ट हुने प्रथम, द्वितीय, तृतीय र सान्त्वना स्थान हासिल गर्ने विद्यार्थीहरूलाई क्रमशः नगद रु. ७ हजार, ५ हजार, ३ हजार र १ हजार रुपैयाँसहित प्रमाणपत्र प्रदान गरिने कोषका महासचिव विष्णुभक्त सिग्देलले जानकारी दिए ।
साउन १३ गते गुरुपुर्णिमाको दिन बिहान ७ बजे अनसन चौतारीबाट बाजागाजा र झाँकीसहित भव्य शोभायात्रा निकालिनेछ । व्यास नगरपालिका परिसरमा रहेको महर्षि व्यासको पूर्णकदको सालिकमा माल्यार्पण तथा पूजा–अर्चनापछि बजार परिक्रमा गरी व्यास गुफामा राष्ट्रिय तथा अन्तर्राष्ट्रिय विद्वान्हरूबाट विशेष प्रवचन हुनेछ ।
व्यासका अध्येता एवं संरक्षक काशीनाथ न्यौपानेका अनुसार यस्ता प्राज्ञिक तथा धार्मिक गतिविधिले व्यास जन्मभूमिको पहिचानलाई विश्वभर उजागर गर्न ठूलो सहयोग पुग्नेछ । उक्त पत्रकार सम्मेलनमा नेपाल पत्रकार महासंघ तनहुँका अध्यक्ष धनपति अधिकारी, पूर्वअध्यक्ष ओमकार आचार्य लगायतले व्यास जन्मुभुमीको प्रचार प्रसारमा लाग्नुपर्ने बताए ।
