१९ साउन, काठमाडौं
नेपाल कम्युनिष्ट पार्टी (नेकपा) अध्यक्षद्वयबीच सोमबार बिहान पनि छलफल भएको छ । बिहान ९ः१५ देखि ११ बजेसम्म दुई अध्यक्षबीच बालुवाटारमा वार्ता भएको प्रधानमन्त्रीका सञ्चार विज्ञ रामशरण बजगाईंले जानकारी दिए ।
आइतबार बिहान भएको वार्ता सकारात्मक बनेपछि आज त्यसकै निरन्तरता रहेको प्रधानमन्त्री केपी शर्मा ओलीको सचिवालयको भनाइ छ । सोमबारको वार्तामा पनि साक्षीका रुपमा वरिष्ठ नेता तथा पूर्वप्रधानमन्त्री झलनाथ खनाल र संसदीय दलका उपनेता सुवासचन्द्र नेम्बाङको सहभािगता थियो ।
गत असार १० गतेदेखि शुरु भएको नेकपा स्थायी कमिटी बैठकमा केही नेताहरूले प्रधानमन्त्री तथा पार्टी अध्यक्ष ओलीको राजीनामा माग गर्नुभएपछि बैठक अवरुद्ध हुँदैआएको छ । असार १८ गतेसम्म करिब नियमित चलेको स्थायी कमिटी बैठक सोपछि निरन्तर स्थगित हुँदैआएको छ ।
पछिल्लो पटक साउन १३ गते बालुवाटारमा प्रचण्ड पक्षका नेताहरूको एकपक्षीय स्थायी कमिटीको भेला भएपछि दुई अध्यक्षबीचको तिक्तता झन् बढेको अनुमान गरिएको थियो । नेकपाका दुई अध्यक्षहरूको आइतबार बिहान करिब तीन घण्टा भएको वार्ताले वातावरण सकारात्मक बनाएको भनिए पनि सहमति केही भएको छैन ।
नेकपा स्थायी कमिटी बैठक अहिले अनिश्चित्कालसम्म स्थगित भएपनि पुनः बैठक बस्नेगरी अध्यक्षद्वयले सहमतिको प्रयास गरिरहेका छन् । स्थायी कमिटी बैठकका एजेण्डामाथि छलफल हुन बाँकी रहेकाले सहमति बनेपछि बैठक पुनः बस्ने नेकपाका नेताहरूले बताएका छन् ।
