२८ साउन, काठमाडौं
नेपाल पत्रकार महासंघका पूर्व सचिव एंव कान्तिपुर दैनिकमा आबद्ध पत्रकार बलराम बानियाँको शव मकवानपुरमा फेला परेको छ ।
महानगरीय अपराध महाशाखाका एसएसपी दीपक थापाले पत्रकार बानियाँको मृत शरीर मंगलबार बिहान ११ बजे मकवानपुरको सिस्नेरीमा रहेको माण्डो जलविद्युत् परियोजना क्षेत्रमा फेला परेको बताए । बाँनियाको शव हेटौंडा अस्पतालमा राखिएको छ ।

सोमबार दिउँसोदेखि सम्पर्कविहीन भएपछि कान्तिपुर पब्लिकेशनले प्रहरीलाई खबर गरेको थियो । राजधानीको बल्खुचोकमा सोमबार पौने चार बजे प्रहरीको गस्ती टोलीले उहाँलाई सोधपुछ गरेको थियोे । बानियाँ पुलमुनि जाँदै गर्दा उहाँको जुत्ता हिलोमा अड्किएको र त्यसपछि खोलाको पानीमा लडेपछि पानीको वहाबले बगाएको स्थानीयले प्रहरीलाई जानकारी गरेको एसएसपी थापाले जानकारी दिए ।

तनहूँको भानु नगरपालिका निवासी बाँनिया तीन दशकदेखि कान्तिपुर दैनिकमा आबद्ध थिए । मृतक बाँनियाका श्रीमती, एक छोरा र एक छोरी छन् । उनी नेपाल पत्रकार महासंघका पूर्व सचिव समेत रहेका थिए ।