१३ भदौ, काठमाडौं
काठमाडौँ उपत्यकामा दिनहुँ कोरोना भाइरस (कोभिड–१९) सङ्क्रमित बढेसँगै सरकारले तिनको उपचार गर्न नौ हजार शय्या तयार गर्ने भएको छ । तीमध्ये अधिकांश शय्या आइसोलेसनका लागि तयार भइसकेका छन् ।
स्वास्थ्य तथा जनसङ्ख्या मन्त्रालयले ती शय्यामध्ये लक्षण भएका सङ्क्रमितको उपचार गर्न दुई हजार र बाँकी सात हजार लक्षण नभएका सङ्क्रमितलाई आइसोलेट गर्न तयार गर्न लागिएको हो । स्वास्थ्य तथा जनसङ्ख्या मन्त्रालयका कोभिड–१९ इन्सिडेन्ट कमान्ड सिस्टम (आईसीएस)का प्रमुख डा.गुणराज लोहनीले मन्त्रालयले सरकारी, निजी अस्पताल तथा अन्य भवन प्रयोग गरी आइसोलेसन सेन्टर तथा उपचारस्थल तयार पारेको जानकारी दिए । उनले नौ हजारमध्ये झन्डै ७० प्रतिशत शय्या प्राप्त भइसकेको भन्दै बाँकी शय्या थप्न आवश्यक अनुमगन तथा तयारी भइरहेको जानकारी दिए ।
उनले आइसोलेसनका लागि डेढ अर्ब रुपियाँ बजेट छुट्ट्याइएको जानकारी दिए । उक्त रकम भवनको भाडाबाहेक हो । यो सरकारको नीतिअनुसार काम भएको डा. लोहनीले बताए । लक्षण नभएका सङ्क्रमित राख्न अहिले नेपाल विद्युत् प्राधिकरणको तालिम केन्द्र खरीपाटीमा दुई सय शय्या तयारी अवस्थामा रहेको र उक्त केन्द्र तीन सय शय्या सम्मको बनाउने योजना रहेको लोहनीले बताए ।
यस्तै कीर्तिपुरस्थित आयुर्वेद केन्द्रमा २२०, दहचोकस्थित मनमोहन मेडिकल कलेजको भवनमा ३२० शय्या तयारी अवस्थामा छ । यस्तै इचङ्गुुनारायणमा रहेको आपत्कालीन भवनमा ५०० शय्या, यती अस्पतालमा ५० शय्या तयारी अवस्थामा छ । मन्त्रालयले जाउलाखेलमा रहेको स्टाफ कलेजमा सय, बालाजुस्थित जनमैत्री अस्पतालमा तीन सय, वसुन्धरास्थित कान्तिपुर डेन्टल कलेज शिक्षण अस्पतालमा सय र कान्तिपुर अस्पताल तीनकुनेमा ५० शय्याको आइसोलेसन तयार गरी लक्षण नभएका सङ्क्रमितलाई राख्ने तयारी गरेको छ ।
यस्तै लक्षण भएका कोरोना सङ्क्रमितलाई अहिले शहीद शुक्रराज ट्रपिकल तथा सरुवा रोग अस्पताल टेकु, पाटन अस्पताल, त्रिवि शिक्षण अस्पताल, बलम्बुस्थित सशस्त्र प्रहरीको अस्पतालमा राखिएको छ ।
यस्तै अन्य उपचारका लागि गएका तर पीसीआर गर्दा सङ्क्रमित भएका व्यक्तिलाई सम्बन्धित अस्पतालमै आइसोलेसन वार्डमा राखी उपचार गरिएको छ । यी अस्पतालमा कान्ति बाल अस्पताल, वीर, नेपाली सेना, नर्भिक अस्पताललगायत छन् । अब मन्त्रालयले छुट्ट्याउन लागेकामा मेघा अस्पतालमा ५० शय्या, नेपाल मेडिकल कलेजमा सय शय्या, केएमसी दुवाकोटमा एक शय्या, किस्ट मेडिकल कलेजमा सय शय्याबाट कोरोना सङ्क्रमितलाई सेवा दिने गरी सम्झौता गरिएको छ ।
