२९ माघ, देवघाट
देवघाट गाउँपालिकामा कभर्ड हल बन्ने भएको छ । गाउँपालिकाको आर्थिक सहयोगमा देवघाट युवा तथा खेलकुँद विकास समितिले सो कभर्ड हल निर्माण गर्न लागेको हो ।
कभर्ड हलको विहिबार राष्ट्रिय सभाका अध्यक्ष गणेशप्रसाद तिमिल्सेनाले शिलान्यास गरे । सो अवसरमा बोल्दै अध्यक्ष तिमिल्सेनाले खेलकुँदले नागरिकलाई स्वस्थ र अनुशासित बनाउन सहयोग गर्ने बताए । नेपालमा खेलकुँदको क्षेत्रमा धेरै सम्भावना भएपनि राष्ट्रको लगानी र पारिवारिक वातावरण समेत नहुँदा यो क्षेत्र पछाडी परेको अध्यक्ष तिमिल्सेनाको भनाई थियो ।
कभर्ड हल ५० लाख रुपैयाँको लागतमा बन्ने र त्यसकोलागि स्थानीय खेलप्रेमी समाजसेवी चन्द्रप्रकाश दुवाडीले १ रोपनी जग्गा निशुल्क उपलब्ध गराएका छन् । कभर्डहल निर्माणकोलागि देवघाट गाउँपालिकाले चालु आर्थिक वर्षमा १० लाख रुपैयाँ विनियोजन गरेको देवघाट युवा तथा खेलकुँद विकास समितिका अध्यक्ष शुकु गुरुङले जानकारी दिए । कभर्ड हल निर्माण पछि ब्याडमिन्टन, भलीवल लगायत इन्डोर खेल सन्चालन गर्न सहज हुने अध्यक्ष गुरुङले बताए ।
