दमौली, बैशाख १२
तनहुँ क्षेत्र नम्बर १ बाट नवनिर्वाचित सांसद डा. स्वर्णिम वाग्लेले तनहुँबासीको भरोसा डगमगाउन नदिने बताएका छन् । उपनिर्वाचनको अन्तिम मत परिणाम सार्वजनिक भएपछि सामाजिक सन्जाल फेसबुक मार्फत मतदातालाई धन्यवाद दिँदै वाग्लेले तनहुँ–१ का मतदाताले आफु प्रति प्रकट प्रत्येक मतको मूल्य, महत्व र आफुले खेल्नु पर्ने भूमिका प्रति अति नै सजग रहने बताएका छन् ।
सांसद वाग्लेले यी मतहरू तनहुँ क्षेत्र नम्बर १ हुँदै समग्र मुलुककै मुहार फेर्नका लागि प्रदान गरेको भन्ने बुझेको बताएका छन् ।
वाग्लेले भनेका छन् ‘सम्पूर्ण मतदाताहरूले मलाई र हाम्रो पार्टी प्रति देखाउनु भएको अपार स्नेह, विश्वास र भरोसा प्रति म सदैब ऋणी हुनेछु ।
यस क्षेत्र बाहेकका देशका सम्पूर्ण सचेत नागरिकहरू जस्ले प्रत्यक्ष अप्रत्यक्षरूपमा आ–आफ्नो स्थानबाट गर्नु भएको सहयोग र प्रेरणाका लागि धन्यवाद । विदेशमा रहनुभएका सम्पूर्ण देशप्रेमी जनसमुदायहरू जस्ले आफ्नो मातृभूमिको विकाशका लागि आशा सञ्चार प्रवाह गर्ने विश्वासका साथ मलाई देखाउनु भएको सद्भाव र सहयोग प्रति धन्यवाद । ’
‘यहाँहरूले म प्रति प्रकट गर्नु भएको र मतदान गर्नु भएको प्रत्येक मतको मूल्य, महत्त्व र मैले खेल्नु पर्ने भूमिका प्रति म अति नै सजग रहने छु र तपाईँहरूको भरोसालाई म कुनै पनि डगमग हुन दिने छैन भन्ने विश्वास पनि दिलाउन चाहन्छु । यी मतहरू तपाईँहरूले मलाई भन्दा पनि तनहुँ क्षेत्र नं. १ हुँदै समग्र मुलुककै मुहार फेर्नका लागि प्रदान गर्नु भएको हो भन्ने आसयका साथ मैले बुझेको छु ।’ वाग्लेले भनेका छन् ।
‘देशका अन्य पार्टीका नेतागण कार्यकर्ता र मतदाताहरूमा लोकतन्त्रको उच्चतम अभ्यासमा सहभागी भई जीतहारको प्रक्रियालाई स्वभाविक रूपमा लिई आगामी दिन हातेमालो गर्दै अघि बढ्ने र तनहुँ हुँदै सम्पूर्ण मुलुककै अर्थतन्त्र उकास्न सहयोग हुने अपेक्षा लिँदै यस निर्वाचनका दौरान भएका सम्पूर्ण गतिविधिलाई सामान्य रूपमा लिन समेत अनुरोध गर्दै धन्यवाद व्यक्त गर्दछु । चुनावी प्रचार प्रसारका क्रममा गरिएका वाचालाई लिपिवद्ध गरि यहाँका स्थानीय र प्रदेश सरकारका जन प्रतिनिधिहरू लगायत यहाँहरूसँगको नियमित सम्पर्क र अर्न्तक्रिया मार्फत योजनाहरू अघि बढाउने छु ।’ वाग्लेले भनेका छन् ।
यसैगरि वाग्लेले देशको राजनीतिक अभ्यास, आर्थिक शिथिलता र युवाहरुको नैराश्यतालाई एकैसाथ चिर्नुपर्ने अवस्था आएकोले चुनौति पनि उत्तिकै रहेको बताएका छन् । बिजयीको प्रमाणपत्र लिएपछि दमौलीमा आयोजित धन्यवाद ¥यालीलाई सम्बोधन गर्दै वाग्लेले राजनीतिक सही ट्रयाकमा छैन् दुषित र बिकृति बन्दै गएको हुँदा राजनीतिलाई सङ्ल्याएर देशको अर्थतन्त्रलाई माथि उकास्नुपर्ने बताए ।
एक व्यक्तिको प्रयासले मात्रै देशको विकासमा कायपलट गर्न नसकिने उल्लेख गर्दै यसका लागि सबै राजनीतिक दलहरु एकै स्थानमा रहेर जिम्मेवारका साथ काम गर्नुपर्ने समय आएको वाग्लेले बताए । रास्वपाले छ महिनाको अवधिमा राष्ट्रिय पार्टी बन्न सकेको चर्चा गर्दै यसले राजनीति क्षेत्रमा एक किसिमको झिल्को दिएको र यसले पराम्परागत दलहरुलाई पनि सुध्रिन बाध्य बनाएको उनको भनाई छ ।
