दमौली, जेठ ९
गन्डकी प्रदेशका मुख्यमन्त्री सुरेन्द्रराज पाण्डेले दमौली अस्पताललाई एक सय बेडको बनाउने प्रतिबद्धता जनाएका छन् । सोमबार दमौली अस्पताल विकास समितिका पदाधिकारीहरुसँग भएको भेटमा मुख्यमन्त्री पाण्डेले दमौली अस्पतालको स्तरिकरण गरि एक सय बेडको बनाउने प्रतिबद्धता जनाएको अस्पताल विकास समितिका अध्यक्ष देवेन्द्र थापाले जानकारी दिए ।
‘हामीले मुख्यमन्त्रीलाई दमौली अस्पताललाई ५० बेडमा स्तरोन्नति गरि दिन अनुरोध गरेका थियौं’ थापाले भने ‘तर मुख्यमन्त्री पाण्डेले एक सय बेडको क्षमतामा स्तरोन्नती गर्ने प्रतिबद्धता जनाउनुभयो ।’ समितिका अध्यक्ष थापाको नेतृत्वमा गएको टोलीले मुख्यमन्त्री पाण्डेलेलाई भेट गरेको थियो ।
सो भेटमा मुख्यमन्त्री पाण्डेले दमौली अस्पतालाई यथाशिघ्र एक सय बेडको बनाउन आफु लाग्ने आश्वासन दिएको अध्यक्ष देबेन्द्र थापाले बताए । साथै सो क्रममा दमौली अस्पतालमा विगत लामो समयदेखि निमित्त सुपरीटेण्डेनको भरमा काम गर्नुपर्दा कठिनाई भएकोले तुरुन्त एक जना सुपरीटेण्डेन पठाउन समेत पहल गरिदिन आग्रह गरेको अध्यक्ष थापाले बताए ।
सो टोलीले गन्डकी प्रदेश सामाजिक विकास तथा स्वास्थ्य मन्त्री सुशीला सिंखडालाई अस्पतालको स्तरोन्नति, हेमोडायलाईसिस सेवा र अस्पतालमा विशेषज्ञ डाक्टरको व्यवस्था गर्न अनुरोध गरेको थियो । यस्तै भौतिक पुर्वाधार विकास तथा यातायात व्यवस्था मन्त्री रेशम बहादुर जुग्जालीलाई अस्पतालको नयाँ भवनको डिपिआर गर्न माग राखेको अध्यक्ष थापाले बताए ।
साथै कृषि तथा भूमिव्यवस्था मन्त्री महेन्द्रध्वज जिसीलाई भेटगरि कृषि तथा पशुपन्छी विकास मन्त्रालयले अस्पतालको स्तरोन्नतिको लागि उपलब्ध गराउने निर्णय गरेको छ भने ३.५ रोपनी जग्गाको सम्झौताको लागि पहल गरिदिन समेत पहल गरेका थिए ।
