दमौली, जेठ १४
सोमबार १६ औं गणतन्त्र दिवस । नेपालमा संविधानसभाको पहिलो बैठकले अत्याधिक बहुमतले २०६५ जेठ १५ गते गणतन्त्रको घोषणा गरेको थियो ।
त्यसैको सम्मानमा हरेक वर्ष जेठ १५ गतेलाई गणतन्त्र दिवसको रुपमा मनाउने गरिन्छ । दोश्रो जनआन्दोलन २०६२÷०६३ को सफलता पश्चात २०६४ सालमा पहिलो पटक संविधान सभाको निर्वाचन भएको थियो । सोही संविधान सभाको पहिलो बैठकले गणतन्त्रको घोषणा गरेको थियो ।
गणतन्त्र दिवसको अवसरमा सोमबार तनहुँमा विभिन्न कार्यक्रम गरिने भएको छ । दिवसको अवसरमा आज विहान दमौली बजारको सडक, सार्वजानिक चोकहरु, पार्कहरु, मठ मन्दिर लगायतका स्थानमा सरसफाई गरिने भएको छ । त्यस्तै व्यास नगरपालिका, स्वास्थ्य कार्यालय तनहुँ, दमौली अस्पताल र नेपाल रेडक्रस सोसाईटीको संयोजनमा आज बिहान दमौलीमा सर्वसाधरणको रक्तचाप र तौल परिक्षण तथा मधुमेहको निशुल्क परिक्षण गरिने भएको छ ।
साथै शिक्षा विकास तथा समन्वय इकाईको आयोजनामा सामुदायिक तथा संस्थागत विद्यालयका माध्यमिक तहका विद्यार्थीहरु विच संघीय गणतन्त्र नेपाल विषयमा निबन्ध लेखन प्रतियोगिता तथा जिल्ला प्रहरी कार्यालय र कारागार शाखाको संयोजनमा तनहुँ कारागारका कैदी बन्दीहरुको विचमा लेख रचना लेखन कार्य समेत गरिने भएको छ ।
त्यस्तै दमौली अस्पतालका विरामीलाई फलफुल वितरणको कार्यक्रम पनि राखिएको छ । गणतन्त्र दिवसलाई जिल्लामा उल्लासमय वातावरणमा मनाउनको लागि तिन दिनसम्म सरकारी कार्यालय र संघ संस्थामा दिपावली गरिने भएको छ ।
