दमौली, असार ३
नेकपा एमाले तनहुँले स्थानीय तहका पालिका स्तरका बैठकहरु आयोजना गरिरहेको छ । संगठन सुदृढिकरण अभियान अन्तर्गत असार १० गते भित्रमा तनहुँका १० वटै स्थानीय तहमा बैठकहरु आयोजना गरिसक्ने एमाले तनहुँको हालैसम्पन्न जिल्ला कमिटिको बैठकले निर्णय गरेको थियो ।
जिल्ला कमिटिको निर्णय अनुसार असार २ गतेबाट सबै पालिकाको बैठक आयोजना भईरहेको एमाले जिल्ला कमिटिका सचिव राजेश्वर ढकालले बताए । हालसम्म असार २ गते म्याग्दे र भिमादमा बैठक आयोजना गरिए भने असार ३ गते आईतबार भानु नगर कमिटिको बैठक आयोजना भयो ।
ढकालका अनुसार असार ४ गते बन्दिपुर, असार ५ गते देवघाट, असार ६ गते शुक्लागन्डकी, आवुँखैरेनी र घिरिङ, असार ८ गते व्यास नगर कमिटि तथा असार ९ गते ऋषिङ गाउँ कमिटिको बैठक आयोजना गरिने छ । एमालेले असार ७ गते भित्र सबै पार्टी सदस्यको लेबी र सदस्यता नविकरण गरिसक्ने निर्णय पनि गरेको छ ।
बैठकमा नेकपा एमालेका केन्द्रिय सदस्य एवं तनहुँ जिल्ला इन्चार्ज तिलकबहादुर महत, केन्द्रिय सदस्य तथा क्षेत्र नम्बर १ की इन्चार्ज भगवती न्यौपाने, केन्द्रिय सदस्य तथा क्षेत्र नम्बर २ की इन्चार्ज सविता रसाईली, जिल्ला कमिटिका अध्यक्ष श्रीप्रसाद श्रेष्ठ सहित जिल्ला कमिटिका पदाधिकारीहरु तथा प्रदेश कमिटिका सदस्यहरुको सहभागिता रहेको छ ।
