दमौली, साउन १०
जिल्ला ट्राफिक प्रहरी कार्यालय तनहुँले मापसे (मादक पदार्थ सेवन) परिक्षण लाई कडाई गर्न थालेको छ । अव मापसे गर्नेले अनिवार्य कक्षा लिनु पर्ने भएको छ । जिल्ला ट्राफिक प्रहरी कार्यालय तनहुँले गत आईतबारबाट मापसे गर्ने सवारी चालकलाई सवारी नियम सम्बन्धी कक्षा लिनु पर्ने व्यवस्था गरेको हो ।
मापसे गर्ने सवारी चालकहरुले साताको दुई दिन आईतबार र बुधबार कक्षा लिने व्यवस्था मिलाईएको जिल्ला ट्राफिक प्रहरी कार्यालय तनहुँका प्रमुख राजिव विष्टले बताए । उनीहरुलाई जिल्ला ट्राफिक प्रहरी कार्यालयमै कक्षा लिने व्यवस्था मिलाईएको छ ।
हालसम्म दुई दिन ३४ जना सवारी चालकलाई सवारी नियम सम्बन्धी सचेतना कक्षा दिईएको विष्टले बताए । मापसे गरेर सवारी चलाएको भेटिए अनिवार्य कक्षा लिनु पर्ने र कक्षा लिईसकेपछि जरिवाना रकम तिरेपछि मात्र आवश्यक काजगात दिईने व्यवस्था मिलाईएको विष्टले बताए ।
ट्राफिक प्रहरीले गत आर्थिक वर्ष ०७९÷०८० मा १७६० वटा मापसे परिक्षणबाट ३५ लाख २० हजार रुपैयाँ राजश्व संकलन गरेको थियो । ट्राफिक प्रहरी कार्यालय तनहुँका प्रमुख विष्टले मापसे चेकिङ कार्यलाई जिल्लाभर नै प्राथमिकतामा राखेको भन्दै दुर्घटना तथा जरिवानाबाट बच्न मापसे नगरिकन सवारी चलाउनु पर्ने बताए ।
