देवघाट, साउन २६
प्रतिनिधि सभाका सांसद डा.स्वर्णिम वाग्लेले विकास निर्माणको सवालमा देवघाट गाउँपालिकासँग समन्वय र सहकार्य गरेर काम गर्ने चाहाना रहेको बताएका छन् । सांसद वाग्लेसँग शुक्रबार देवघाट गाउँपालिकासँग आयोजना गरिएको अन्तरक्रिया कार्यक्रममा बोल्दै सांसद वाग्लेले विकास निर्माणको लागि गाउँपालिकासँग सहकार्य र समन्वय गरिने बताए ।
संघीय सरकार र स्थानीय तहको समन्वय बिना कुनै पनि योजना सार्थक नहुने सांसद वाग्लेको भनाई छ । विकासमा अन्य स्थानीय तह भन्दा देवघाट पछाडी परेको भन्दै उनले देवघाटलाई विकासको मुलधारमा ल्याउने प्रतिबद्धता जनाए । देवघाटमा राष्ट्रिय गौरबको आयोजना ल्याउने र देवघाटलाई धार्मिक पर्यटनको केन्द्र बनाउने बारेमा आफुले पहल गर्ने सांसद वाग्लेले बताए ।
सो कार्यक्रममा देवघाट गाउँपालिकाका अध्यक्ष तिलबहादुर थापाले देवघाटलाई धार्मिक पर्यटनको केन्द्र बनाउने गरि कार्यक्रम र बजेट ल्याउन सांसद वाग्लेसँग अनुरोध गरेका थिए ।
देवघाट गाउँपालिकाका अध्यक्ष तिलबहादुर थापाको अध्यक्षता भएको सो कार्यक्रममा गाउँपालिकाका उपाध्यक्ष भुवन सिंह गुरूङले पनि भनाई राखेका थिए ।
सो कार्यक्रममा देवघाट गाउँपालिकाका प्रमुख प्रशासकीय अधिकृत रमेश सुवेदी, वडा नम्बर ५ का अध्यक्ष एवं गाउँपालिकाका प्रवक्ता पुर्णबहादुर कुँवर लगायत जनप्रतिनिधि र कर्मचारीहरुको सहभागिता रहेको थियो ।
