देवघाट, साउन २६
प्रतिनिधि सभा तनहुँ क्षेत्र नम्बर १ का सांसद डा. स्वर्णिम वाग्ले शुक्रबार देवघाट गाउँपालिका आए । देवघाटका जनतासँग भेटघाट र अन्तरक्रिया कार्यक्रमको लागि सांसद वाग्ले देवघाट आएक थिए । सांसद वाग्लेसँग देवघाटबासीलाई भेट गराउन र अन्तरक्रिया गराउन राष्ट्रिय स्वतन्त्र पार्टीले राम्रै तयारी गरेको थियो । रास्वपा देवघाटका संयोजक बलबहादुर क्षेत्री र अन्य कार्यकर्ताहरु अन्तरक्रिया कार्यक्रमलाई सफल बनाउन एक साता अघि देखी खटेका थिए ।
सांसद वाग्लेसँग भेट्न, आफ्ना कुरा राख्न र सांसदका कुरा सुन्न देवघाट गाउँपालिकाको सिटि हलमा देवघाटबासीको बाक्लो उपस्थिती रहेको थियो । उक्त कार्यक्रममा उपस्थित देवघाटबासीले देवघाटको विकास निर्माण र अन्य समस्याहरुको बारेमा सांसद वाग्लेको ध्यानाकर्षण गराएका थिए ।
सो अवसरमा सांसद वाग्लेले पनि देवघाटको विकास निर्माणको बारेमा कुनै कसर बाँकी नराख्ने प्रतिबद्धता जनाएका थिए । उनले देवघाटलाई धार्मिक पर्यटनको केन्द्र बनाउन आफुले पहल गर्ने बताए ।
संघीय सरकार र स्थानीय तहको समन्वय बिना कुनै पनि योजना सार्थक नहुने सांसद वाग्लेको भनाई छ । विकासमा अन्य स्थानीय तह भन्दा देवघाट पछाडी परेको भन्दै उनले देवघाटलाई विकासको मुलधारमा ल्याउने प्रतिबद्धता जनाए । देवघाटमा राष्ट्रिय गौरबको आयोजना ल्याउने पहल गर्ने सांसद वाग्लेले बताए ।
सो अवसर ३५ जना भन्दा बढी देवघाटबासीले समसामयिक विषयमा सांसद वाग्लेको ध्यानाकर्षण गराएको राष्ट्रिय स्वतन्त्र पार्टी देवघाटका संयोजक बल बहादुर क्षेत्रीले जानकारी दिए ।
